ডিজিটেল ডেস্কঃ মণিপুৰত সংঘটিত উত্তেজনাৰ পাছত মঙলবাৰৰ পৰা ৫ দিনৰ বাবে ইণ্টাৰনেট সেৱা বন্ধ কৰি দিয়া হয়। এই ইণ্টাৰনেট নিৰ্দেশনা দেওবাৰে (১ অক্টোবৰ) সন্ধিয়া ৭.৪৫ বজালৈকে বাহাল থাকিব।
ইয়াৰ উপৰিও ৰাজ্যৰ সকলো বিদ্যালয় তিনিদিন ধৰি বন্ধ থাকিব। ৰাজ্য চৰকাৰে ঘোষণা কৰে যে বুধবাৰে (২৭ ছেপ্তেম্বৰ) আৰু ২৯ ছেপ্তেম্বৰ (শুকুৰবাৰ) বিদ্যালয়ৰ বন্ধ থাকিব। ৰাজ্যত হজৰত মহম্মদৰ জন্ম জয়ন্তী ঈদ-ই-মিলাদ উপলক্ষে ২৮ ছেপ্টেম্বৰ (বৃহস্পতিবাৰ)ত চৰকাৰী বন্ধৰ দিন।
সোমবাৰে (২৫ ছেপ্টেম্বৰ) ছ’চিয়েল মিডিয়াত ভাইৰেল হৈ পৰে জুলাই মাহৰ পৰা মণিপুৰৰ পৰা নিৰুদিষ্ট হোৱা দুজন ছাত্ৰৰ মৃতদেহৰ ছবি। ইয়াৰ পাছত ইম্ফলত অৱস্থিত বিদ্যালয়-মহাবিদ্যালয়ৰ ছাত্ৰ-ছাত্ৰীয়ে প্ৰতিবাদী সমদল উলিয়ায়, ইয়াক নিয়ন্ত্ৰণ কৰিবলৈ আৰক্ষীয়ে লাঠীচালনাৰ আশ্ৰয় লোৱাত ৩০ জনতকৈ অধিক ছাত্ৰ আহত হয়। ইয়াৰ বাবে ৰাজ্যত পুনৰ উত্তেজনা বৃদ্ধি পাইছে।
ৰাজ্যত উত্তেজনাৰ মাজতে মণিপুৰৰ মুখ্যমন্ত্ৰী এন বীৰেণ সিঙে কয় যে নিৰুদিষ্ট হোৱা ছাত্ৰ-ছাত্ৰীৰ কৰুণ মৃত্যুৰ সন্দৰ্ভত মই ৰাইজক আশ্বস্ত কৰিব বিচাৰো যে ৰাজ্য আৰু কেন্দ্ৰীয় চৰকাৰে একেলগে কাম কৰি দোষীক গ্ৰেপ্তাৰ কৰিছে।তেওঁ কয়, “গুৰুত্বপূৰ্ণ তদন্ত আৰু অধিক ক্ষিপ্ৰ কৰিবলৈ চিবিআইৰ সঞ্চালকগৰাকীয়ে বিশেষ দলৰ সৈতে কাইলৈ (বুধবাৰ) পুৱা বিশেষ বিমানেৰে ইম্ফলত উপস্থিত হ’ব।তেওঁলোকৰ উপস্থিতিয়ে এই বিষয়টো ক্ষিপ্ৰতাৰে সমাধান কৰাৰ আমাৰ প্ৰতিশ্ৰুতিৰ কথা কয়। কেন্দ্ৰীয় গৃহমন্ত্ৰী অমিত শ্বাহৰ সৈতে মোৰ অহৰহ যোগাযোগ আছে। যাতে আমি অপৰাধীক বিচাৰি উলিয়াই ন্যায়লয়ৰো কাষ চাপিব পাৰোঁ৷”
Continue Reading
