মৃত্যুদূত মিগ-২১! পুনৰ দুৰ্ঘটনাগ্ৰস্ত বায়ুসেনাৰ বিমান, পাইলট নিহত

ডিজিটেল ডেস্ক : দেশত পুনৰ ভাৰতীয় বায়ুসেনাৰ বিমান দুৰ্ঘটনাগ্ৰস্ত৷ ৰাজস্থানৰ ভাৰত-পাকিস্তান সীমান্তৰ জেইছালমেৰত শুকুৰবাৰে সন্ধিয়া মাজ আকাশতে বায়ুসেনাৰ মিগ-২১ বাইছন ভাঙি পৰাৰ ফলত বিমানখনৰ পাইলটগৰাকীৰ মৃত্যু হোৱা বুলি জানিব পৰা গৈছে৷ উল্লেখ্য যে চলিত বৰ্ষত পঞ্চমবাৰৰ বাবে মিগ বিমান দু্ৰ্ঘটনাগ্ৰস্ত হৈছে।

নিশা ৮বাজি ৩০ মিনিটত প্ৰশিক্ষণ চলি থকাৰ সময়তে ৱেষ্টাৰ্ণ ছেক্টৰত বিমানখন দুৰ্ঘটনাগ্ৰস্ত হয়। বিমান দুৰ্ঘটনাত উইং কমাণ্ডাৰ হৰ্ষিত সিনহাৰ মৃত্যু ঘটিছে। এই ঘটনাৰ তদন্ত ঘোষণা কৰা হৈছে বুলি বায়ুসেনাই এক বিবৃতিযোগে প্ৰকাশ কৰিছে৷ এই দুৰ্ঘটনাক লৈ ৰাজস্থানৰ মুখ্যমন্ত্ৰী অশোক গেহলটৰ লগতে ৰাজ্যখনৰ ৰাজ্যপালেও শোক ব্যক্ত কৰে৷

উল্লেখ্য যে, মিগ-২১ ছিৰিজৰ শেহতীয়া প্ৰযুক্তিৰ বিমান হৈছে বাইছন। ভাৰতীয় বায়ুসেনাই মিগ-২১ বাইছন যুদ্ধবিমানৰ চাৰিটা স্কোৱাড্ৰেন পৰিচালনা কৰে। প্ৰশিক্ষণকালতে এনে দুৰ্ঘটনা সংঘটিত হোৱাৰ পাছত এতিয়া মিগ বিমানৰ সুৰক্ষাৰ দিশটোৰ প্ৰতি আশংকাই দেখা দিছে। এতিয়ালৈকে প্ৰায় চাৰিশ মিগ বিমান দুৰ্ঘটনাগ্ৰস্ত হৈছে। তদুপৰি, বিগত ছয় দশকত কমেও দুশ গৰাকী পাইলটৰ মৃত্যু হৈছে।