ডিজিটেল ডেস্কঃ শুকুৰবাৰে মুম্বাই ক্ৰিকেট সন্থাই মহেন্দ্ৰ সিং ধোনীক বিশেষভাৱে সম্বৰ্ধনা জনায়। ২০১১ চনত ভাৰতৰ বিশ্বকাপ জয়ৰ বাবে ধোনীক সন্মান জনোৱা হয়৷ এই অনুসৰি ৩৩ হাজাৰ আসনবিশিষ্ট ৱানখেড়ে ষ্টেডিয়ামৰ পাঁচখন আসনৰ নাম ধোনিৰ নামেৰে নামাকৰণ কৰা হৈছে।
মুম্বাইত আই পি এলৰ এখন মেচ খেলিবলৈ গৈ ধোনীয়ে নিজেই নতুনকৈ সজোৱা আসনসমূহ উদ্বোধন কৰে। কিছুদিন পূৰ্বে সেই বিশেষ আসনকেইখন বাছনি কৰা হৈছিল। ভাৰতৰ দ্বিতীয় এদিনীয়া বিশ্বকাপ জয়ৰ সৈতে জড়িত হৈ আছে সেই আসনকেইখন৷
২০১১ চনত ভাৰতে শ্ৰীলংকাক পৰাস্ত কৰি বিশ্ব চেম্পিয়ন হৈছিল। খেলখনৰ শেষৰ বলত ধোণীয়ে ছয় মাৰি ভাৰত জয় কৰে। বলটো উৰি গৈছিল দৰ্শকৰ গেলেৰীলৈ। সেই মেচখনৰ ভিডিঅ’ চোৱাৰ পাছত মুম্বাই ক্ৰিকেট বিষয়াসকলে গেলেৰীৰ সেই নিৰ্দিষ্ট অংশটো চিনাক্ত কৰে। বলটো য’ত পৰিছিল, সেই অংশৰ পাঁচখন আসনৰ নাম ধোনিৰ নামেৰে ৰখা হৈছে৷
ভাৰতীয় প্ৰাক্তন অধিনায়কগৰাকীক মুম্বাই ক্ৰিকেট কৰ্তৃপক্ষই নতুনকৈ ডিজাইন কৰা আসনসমূহ উদ্বোধন কৰিবলৈ আমন্ত্ৰণ জনাইছিল। তেওঁলোকৰ আহ্বানৰ প্ৰতি সঁহাৰি জনাই শুকুৰবাৰে ধোনীয়ে মনোনীত আসনসমূহ উদ্বোধন কৰে।
উল্লেখ্য যে ৱানখেড়ে ষ্টেডিয়ামত পলি উমৰিগড় আৰু বিজয় মাকন্দৰ নামেৰে গেট আছে। বিজয় মাৰ্চেণ্ট, সুনীল গাওস্কৰ আৰু শচীন টেণ্ডুলকাৰৰ নামেৰে ষ্টেণ্ডৰ নামকৰণ কৰা হৈছে। এইবাৰ ধোনিৰ নামত আসন ৰখা হৈছে৷
Continue Reading
