ডিজিটেল ডেস্কঃ লোকসভা নিৰ্বাচনৰ পূৰ্বে হাৰিয়ানাত আৰম্ভ হৈছে ৰাজনৈতিক নাটক। হাৰিয়ানাৰ মুখ্যমন্ত্ৰী মনোহৰ লাল খট্টৰে মঙলবাৰে মিত্ৰশক্তিৰ সৈতে আসন ভাগ-বতৰাক লৈ হোৱা মতানৈক্যৰ পৰিণতিত পদত্যাগ কৰে। মুখ্যমন্ত্ৰীৰ পদত্যাগৰ পিছত গোটেই মন্ত্ৰীসভাই পদত্যাগ কৰে। হাৰিয়ানাৰ নতুন মুখ্যমন্ত্ৰী হ’ব বিজেপিৰে নায়াব সিং ছাইনী।
তেওঁ আজি শপত গ্ৰহণ কৰিব। উল্লেখ্য বিজেপি-জেজেপি মিত্ৰজোঁটে হাৰিয়ানাত চৰকাৰ গঠন কৰিছিল। সূত্ৰ অনুসৰি খট্টৰৰ বিজেপিয়ে আগন্তুক লোকসভা নিৰ্বাচনত আসন ভাগ-বতৰাক লৈ দুষ্মন্ত চৌটালাৰ জননায়ক জনতা পাৰ্টীৰ সৈতে বিবাদত লিপ্ত হয়। খট্টৰে মঙলবাৰে পুৱা ৰাজ্যপাল বান্দাৰু দত্তৰেয়াৰ ওচৰত পদত্যাগ পত্ৰ দাখিল কৰে। গোটেই ঘটনাটোক লৈ বিজেপি অসন্তুষ্ট হৈ পৰিছে। ৯০ জনীয়া হাৰিয়ানা বিধানসভাত বিজেপিৰ ৪০ জন বিধায়ক আছে।
গেৰুৱা দলটোৱে ইয়াৰ সহযোগী জেজেপিকলৈ চৰকাৰ গঠন কৰিছিল। জেজেপিয়ে ১০ খন লোকসভা আসনৰ ভিতৰত তিনিখন দাবী কৰিছিল। অৱশ্যে, বিজেপিয়ে এখনতকৈ অধিক আসন এৰি দিবলৈ অসন্মত হৈছিল। ইয়াৰ বিজেপি-জেজেপিৰ মাজত বিবাদে গা কৰি উঠিছিল। সোমবাৰে এনে বিবাদৰ অন্ত পেলাবলৈ বিজেপিৰ ৰাষ্ট্ৰীয় সভাপতি জে পি নাড্ডাই জেজেপিৰ শীৰ্ষ নেতৃত্বৰ সৈতে এখন বৈঠকত মিলিত হৈছিল। কিন্তু বৈঠকত কোনো সমাধান সূত্ৰ ওলোৱা নাছিল। এনে পৰিস্থিতিত খট্টৰে পদত্যাগ কৰে বুলি বহুতে ধাৰণা কৰিছে। আন এক সূত্ৰই প্ৰকাশ কৰা মতে মিত্ৰজোঁটত অন্তৰ্দ্বন্দ্বৰ বাবে নহয়, লোকসভা নিৰ্বাচনত প্ৰতিদ্বন্দ্বিতা কৰিব বাবেই খট্টৰে পদত্যাগ কৰিছে। অৱশ্যে খট্টৰে পদত্যাগৰ কাৰণ এতিয়ালৈকে ৰাজহুৱা কৰা নাই।
Continue Reading
