নেপালৰ এখন ১০০ টকীয়া নোটে হাহাকাৰ লগাইছে ভাৰতত, কিন্তু কিয়?

বৈদেশিক পৰিক্ৰমা মন্ত্ৰীয়ে জয়শংকৰে ভুৱনেশ্বৰত এক অনুষ্ঠানত অংশগ্ৰহণ কৰি কয়  "মই বিষয়টো জানিব পাৰিছো। কিন্তু মই ভাবো আমাৰ স্থিতি অতি স্পষ্ট। আমি নেপালৰ সৈতে সীমান্ত সমস্যাৰ বিষয়ে  আলোচনা কৰি আছো। ইয়াৰ মাজতে তেওঁলোকে কিছুমান একপক্ষীয় পদক্ষেপ গ্ৰহণ কৰিছে। কিন্তু এনে কৰিলেই পৰিস্থিতি বা বাস্তৱতা সলনি নহয়। ” নতুন ১০০ টকাৰ নোটখনত নেপালৰ অংশ হিচাপে ভাৰতীয় ভূখণ্ড লিপুলেখ, লিম্পিয়াধুৰা আৰু কালাপানীক দেখুওৱা হৈছে। শুকুৰবাৰে নেপালৰ কেবিনেট বৈঠকত এই নোটত সেউজ সংকেত দিয়া হৈছিল। প্ৰধানমন্ত্ৰী পুষ্প কমল দাহাল প্ৰচণ্ডৰ অধ্যক্ষতাত অনুষ্ঠিত কেবিনেট বৈঠকত নেপালী নোটৰ ওপৰত নতুন মানচিত্ৰ ছপা কৰাৰ সিদ্ধান্ত লোৱা হয় বুলি চৰকাৰী মুখপাত্ৰ ৰেখা শৰ্মাই প্ৰকাশ কৰিছে।

নতুন দিল্লীয়ে কৈছে যে তিনিওটা অঞ্চল ভাৰতীয় ভূখণ্ডৰ অংশ। কিন্তু নেপালে দীৰ্ঘদিন ধৰি দাবী কৰি আহিছে যে লিপুলেখ, লিম্পিয়াধুৰা আৰু কালাপানী নেপালৰ অংশ। ২০২০ চনৰ ১৮ জুনত নেপাল চৰকাৰে প্ৰকাশ কৰা মানচিত্ৰতো তিনিওটা অঞ্চলক দেশখনৰ অংশ হিচাপে দেখুওৱা হৈছিল। নতুন ১০০ টকীয়া নোট খনতো সেই তিনি স্থানক নেপালৰ অংশ হিচাবে দেখুওৱা হৈছে৷ উল্লেখ্য ভাৰতৰ সৈতে  নেপালৰ ১,৮৫০ কিলোমিটাৰ দৈৰ্ঘ্যৰ  সীমান্ত আছে। এই সীমান্তত  পাঁচখন ৰাজ্য অন্তৰ্ভুক্ত হৈ  আছে। সেই ৰাজ্য কেইখন হ’ল ছিকিম, পশ্চিম বংগ, বিহাৰ, উত্তৰ প্ৰদেশ আৰু উত্তৰাখণ্ড।