ডিজিটেল ডেস্ক: নেপালত পুনৰ হিন্দু ৰাষ্ট্র স্থাপন আৰু ৰাজতন্ত্ৰ প্ৰৱৰ্তনৰ দাবীত তীব্ৰ প্ৰতিবাদ আৰম্ভ হৈছে৷ ৰাজধানী কাঠমাণ্ডুৰ ৰাজপথত সহস্ৰাধিক প্ৰতিবাদকাৰীৰ ব্যাপক প্ৰতিবাদ৷ বুধবাৰে সহস্ৰাধিক প্ৰতিবাদকাৰীয়ে প্ৰধানমন্ত্ৰীৰ কাৰ্যালয়ৰ লগতে ঘেৰাও কৰাৰ চেষ্টা চলায় নেপালৰ বহু চৰকাৰী কাৰ্যালয়৷ যাৰফলত প্ৰতিবাদকাৰী আৰু আৰক্ষী লিপ্ত হয় খণ্ডযুদ্ধত৷ লাঠীচালনাৰ লগতে কন্দুৱা প্ৰয়োগ আৰু পানীহিলৈ প্ৰয়োগ কৰে আৰক্ষীয়ে৷ নেপালৰ ৰাষ্ট্রীয় প্ৰজাতন্ত্ৰ পাৰ্টীৰ নেতৃত্বত এনেদৰে সাব্যস্ত কৰা হয় প্ৰতিবাদ৷ য’ত নেপালত গণতন্ত্ৰৰ অৱসান ঘটাই পুনৰ ৰাজতন্ত্ৰ প্ৰৱৰ্তনৰ শ্ল’গানেৰে ৰাজপথ মুখৰ কৰে প্ৰতিবাদকাৰীসকলে৷
ইতিপূৰ্বে বিগত ফ্ৰেব্ৰুৱাৰী মাহত নেপালৰ প্ৰধানমন্ত্ৰীৰ কাৰ্যালয়লৈ এক ৪০ দফীয়া দাবী চনদ প্ৰেৰণ কৰিছিল প্ৰজাতন্ত্ৰ পাৰ্টীয়ে৷ য’ত নেপালত অব্যাহত ব্যাপক দুৰ্নীতিৰ বিৰুদ্ধে ব্যৱস্থা গ্ৰহণৰ বাবে চৰকাৰক জনোৱা হৈছিল আহ্বান৷ দৰাচলতে ২০০৬ চনত নেপালত ৰাজতন্ত্ৰৰ বিৰুদ্ধে সূত্ৰপাত ঘটিছিল বিদ্ৰোহৰ৷ যাৰফলত নেপালৰ সংসদৰ ওচৰত সকলো ক্ষমতা অৰ্পণ কৰিবলৈ বাধ্য হৈ পৰিছিল দেশখনৰ তদানীন্তন ৰজা জ্ঞানেন্দ্ৰ৷
আনহাতে ২০০৭ চনত নিজকে হিন্দুৰ পৰা ধৰ্ম নিৰপেক্ষ ৰাষ্ট্রৰূপে ঘোষণা কৰিছিল নেপালে৷ আনহাতে ২০০৮ চনত নেপালত অন্ত পৰিছিল ২৪০ বছৰ পুৰণি ৰাজতন্ত্ৰৰ৷ যাৰপাছত এতিয়ালৈ নেপালত গঠিত হৈছে ১৩ খনকৈ চৰকাৰ৷ কিন্তু বিগত কিছুদিন ধৰি দেশখনত অব্যাহত আছে ৰাজনৈতিক অস্থিৰতা৷
শেহতীয়াকৈ নেপালৰ প্ৰধানমন্ত্ৰী পুষ্পকুমাৰ দাহাল প্ৰচণ্ডই চীন সমৰ্থক কে পি শৰ্মা অলীৰ কমিউনিষ্ট পাৰ্টী অব নেপালৰ সহযোগত গঠন কৰিছিল চৰকাৰ৷ তাৰ বিপৰীতে দেশখনৰ ৰাজনৈতিক নেতাৰ দুৰ্নীতি আৰু অপশাসনত অতিষ্ঠ জনতাই তুলিলে নেপালত পুনৰ ৰাজতন্ত্ৰ প্ৰৱৰ্তন আৰু হিন্দু ৰাষ্ট্র মৰ্যাদা বাহালৰ দাবী৷
Continue Reading
