ভাৰতত ৫ বছৰত দুগুণ বৃদ্ধি প্লাষ্টিক আৱৰ্জনা: জৈৱ-বৈচিত্ৰ্যলৈ ভাবুকি

ডিজিটেল ডেস্ক: জৈৱ-বৈচিত্ৰ্যলৈ ভাবুকি কঢ়িয়াই ভাৰতত দৈনিক বৃদ্ধি পাবলৈ ধৰিছে প্লাষ্টিক আৱৰ্জনা৷ বিগত পাঁচ বছৰত প্লাষ্টিক আৱৰ্জনাৰ উৎপাদন দুগুণতকৈয়ো অধিক বৃদ্ধি পোৱা বুলি নিম্ন সদনত সদৰী কৰিছে পৰিৱেশ, বন আৰু জলবায়ু পৰিৱৰ্তন দপ্তৰৰ ৰাজ্যিক মন্ত্ৰী অশ্বিনী কুমাৰ চৌবেই৷ তেওঁ কয়, ভাৰতত বাৰ্ষিক ২১.৮ শতাংশকৈ প্লাষ্টিক আৱৰ্জনা বৃদ্ধি হৈছে৷

মন্ত্ৰীগৰাকীয়ে লগতে পূৰ্বৰ তথ্য উল্লেখ কৰি কয় যে, ২০১৯-২০ বৰ্ষত ৩৪ লাখ টনতকৈয়ো অধিক প্লাষ্টিক আৱৰ্জনা আৰু ২০১৮-১৯ বৰ্ষত ৩০.৫৯ লাখ টন প্লাষ্টিক আৱৰ্জনা উৎপন্ন হৈছিল। সদনত দাখিল কৰা তথ্য অনুসৰি, বিগত পাঁচ বছৰত দেশত প্লাষ্টিক আৱৰ্জনাৰ পৰিমাণ দুগুণতকৈয়ো অধিক বৃদ্ধি হৈছে, কিয়নো দেশখনে ২০১৫-১৬ বৰ্ষত ১৫.৮৯ লাখ টন প্লাষ্টিক আৱৰ্জনা উৎপাদন কৰিছিল৷ উল্লেখযোগ্য যে, ভাৰতত ২০১৯-২০ বৰ্ষত ৩৪ লাখ টনতকৈয়ো অধিক প্লাষ্টিক আৱৰ্জনা আৰু ২০১৮-১৯ বৰ্ষত ৩০.৫৯ লাখ টন আৱৰ্জনা উৎপন্ন হৈছিল।

কালি সদনত পৰিৱেশ মন্ত্ৰীগৰাকীয়ে দাখিল কৰা তথ্যৰ পাছতে উদ্বিগ্ন হৈ পৰিছে দেশবাসী৷ কিয়নো, মানৱ সভ্যতাৰ প্ৰতি ভাবুকিস্বৰূপ প্লাষ্টিকৰ ক্ৰমবৰ্ধমান পৰিমাণে জনস্বাস্থ্য আৰু জৈৱ-বৈচিত্ৰ্যলৈ ভাবুকি কঢ়িয়াই আনিছে৷ প্লাষ্টিক ব্যৱহাৰৰ ক্ষেত্ৰত কঠোৰ আইন প্ৰণয়ন নকৰিলে আগত দিনত যে, ই এক ভয়াৱহ সমস্যা হৈ উঠিব, সেয়া ধূৰুপ৷