ডিজিটেল ডেস্কঃ নিজৰ জন্মদিনৰ দিনাই মৃত্যুক সাবটিলে এজনী কণমানি ছোৱালীয়ে। মৃত্যু মানেই দুখৰ বিষয় কিন্তু কিছুমান মৃত্যুৰ ঘটনা ইমানেই বেদনাদায়ক যে সকলোৰে অন্তৰে কান্দি উঠে। জন্মদিন বুলি আনন্দত অধীৰ হৈ আছিল মানৱী নামৰ ১০ বছৰীয়া ছোৱালীজনী। মানৱীৰ জন্মদিন বাবেই অভিভাৱকে অনলাইনত অৰ্ডাৰ কৰি আনিলে এটা কেক। সেই কেক খায়ে মৃত্যুক সাবটি ল'লে মানৱীয়ে। এই কৰুণ ঘটনা সংঘটিত হৈছে পঞ্জাৱৰ পাটিয়ালাত।
জন্মদিনৰ কেক খাই ৰহস্যজনকভাৱে ১০ বছৰীয়া কন্যা শিশুটিৰ মৃত্যু ঘটিছে। এই ঘটনাই এতিয়া শোকৰ ছাঁ পেলাইছে। ধাৰণা কৰা অনুসৰি খাদ্যৰ বিষক্ৰিয়াৰ ফলতে শিশুটিৰ মৃত্যু ঘটিছে। ছোৱালীজনীৰ ভনীয়েকেও কেকটো খাইছিল। ফলত দুই বাই-ভনী অসুস্থ হৈ পৰে।
মানৱীয়ে নিজৰ জন্মদিন বৰ আনন্দেৰে উদযাপন কৰিছিল। জন্মদিনৰ কেকটো অনলাইনত অৰ্ডাৰ কৰা হৈছিল। মানৱী আৰু তেওঁৰ ভনীয়েকে কেকটো খাইছিল। এটা ভিডিঅ'ত দেখা গৈছে যে পৰিয়ালৰ আন সদস্যসকলে মানৱীক কেক খুৱাই আছে। কেকটো খোৱাৰ পিছতে মানৱী অসুস্থ হৈ পৰ। মানৱীৰ ভনীয়েকেও বমি কৰিবলৈ আৰম্ভ কৰে।
তেওঁলোকক ততাতৈয়াকৈ চিকিৎসালয়লৈ লৈ যোৱা হয় যদিও চিকিৎসকে মানৱীক মৃত ঘোষণা কৰে। অৱশ্যে, তেওঁৰ ভনীয়েকৰ কোনোমতে প্ৰাণৰক্ষা পৰিছে৷ ঘটনা সন্দৰ্ভত মানৱীৰ পৰিয়ালে এখন এজাহাৰ দাখিল কৰিছে।
পাটিয়ালা আৰক্ষীয়ে এই মৃত্যুৰ গোচৰত তিনিজন অভিযুক্তক গ্ৰেপ্তাৰ কৰিছে। বেকাৰীৰ মালিক এতিয়াও পলাতক হৈ আছে। ছোৱালীজনীৰ পৰিয়ালে অনলাইন ফুড ডেলিভাৰী এপ Zomato ৰ পৰা এই কেকটো অৰ্ডাৰ কৰিছিল।
পঞ্জাৱ আৰক্ষীয়ে এই বিষয় সন্দৰ্ভত 'কেক কানহা'ৰ বিৰুদ্ধে গোচৰ ৰুজু কৰে। কিন্তু, যি ঠিকনা দিয়া হৈছিল, সেই ঠিকনাত তেনে কোনো দোকান নাই, সেই স্থানত 'ইণ্ডিয়া বেকাৰী' নামৰ দোকান এখন আছে।
ইণ্ডিয়া বেকাৰীৰ স্বত্বাধিকাৰী গুৰপ্ৰীতে কয় যে তেওঁৰ দোকানৰ পৰা কোনো কেক লোৱা হোৱা নাই আৰু ইয়াৰ সৈতে তেওঁৰ কোনো সম্পৰ্ক নাই।
বিষয়টোৰ তদন্ত চলি আছে আৰু শীঘ্ৰে ব্যৱস্থা গ্ৰহণ কৰা হ'ব।
এইবোৰ ঘটনা দেখা বা জনাৰ পাছত সকলোৱে সাৱধান হ'বৰ হ'ল। অনলাইন ফুড সেৱাত অধিক আশ্ৰয় লোৱাতকৈ ঘৰতে ৰন্ধন-প্ৰকৰণ কৰি নিজৰ স্বাস্থ্য সুৰক্ষিত কৰাটো ভাল।
Continue Reading
