নিৰ্বাচনী বণ্ডঃ কেৱল বিজেপিয়ে অকলে সংগ্ৰহ কৰিছিল ৭,০০০ কোটি টকা! বিৰোধী দলসমূহৰ সন্মিলিত উপাৰ্জনৰ পৰিমাণ ৬,২০০ কোটি টকা

 তাতেই এই পৰিসংখ্যাবোৰ পোহৰলৈ  আহিছে। বিৰোধীয়ে আগতে অভিযোগ কৰিছিল যে গেৰুৱা দলটোৱেই "অসাংবিধানিক" বুলি আদালতে চিহ্নিত কৰা  নিৰ্বাচনী বণ্ডৰ পৰা সৰ্বাধিক উপাৰ্জন কৰিছিল।

নিৰ্বাচন আয়োগে দেওবাৰে এক বিবৃতিত কয়  যে ৰাজনৈতিক দলসমূহে উচ্চতম ন্যায়ালয়ৰ অন্তৱৰ্তীকালীন আদেশ অনুসৰণ কৰি নিৰ্বাচনী বণ্ডৰ তথ্য দাখিল কৰিছে। এই তথ্য   দেওবাৰে আয়োগৰ অফিচিয়েল ৱেবছাইটত আপলোড কৰা হয়। ৱেবচাইটত  ৰাজনৈতিক দলৰ দ্বাৰা জাৰি কৰা নিৰ্বাচনী বণ্ডৰ তথ্য, তাৰিখ আৰু বণ্ডৰ পৰিমাণৰ কথা উল্লেখ আছে ।  ভাৰতীয় ষ্টেট বেঙ্কৰ (এছ.বি.আই.) কোনটো শাখাত বণ্ডবোৰ আছিল, ক্ৰয়ৰ তাৰিখ আৰু সেইবোৰ ৰাজনৈতিক দলবোৰে লাভ  কৰাৰ তাৰিখ আদিও উল্লেখ কৰা হৈছে।

 এই বণ্ডবোৰৰ জৰিয়তে কোনটো দলে কিমান টকা লাভ কৰিছে? বিজেপিয়ে বণ্ডৰ পৰা সৰ্বাধিক উপাৰ্জন কৰিছে। ৬,৯৮৬.৫ কোটি টকা গেৰুৱা শিবিৰৰ ভাণ্ডাৰলৈ গৈছে। তালিকাখনত তৃণমূল কংগ্ৰেছ (১,৩৯৭ কোটি টকা), কংগ্ৰেছ (১,৩৩৪ কোটি টকা) , ওড়িশাৰ  শাসনাধিষ্ঠ বিজেডি (৯৪৪.৫ কোটি টকা), তামিলনাডুৰ ডিএমকে (৬৫৬.৫ কোটি টকা) আৰু অন্ধ্ৰ প্ৰদেশৰ ৱাইএছআৰ কংগ্ৰেছ (৪৪২.৮ টকা) উপাৰ্জন কৰাৰ তথ্য  অন্তৰ্ভুক্ত হৈ  আছে। জেডিএছে লাভ কৰা ৮৯.৭৫  কোটি টকাৰ ভিতৰত, মেঘা ইঞ্জিনিয়াৰিঙে  ৫০  কোটি টকা পৰিশোধ কৰিছিল। প্ৰতিষ্ঠানটো নিৰ্বাচনী বণ্ড ক্ৰয় কৰাত দ্বিতীয় স্থানত আছে।  ডিএমকেৰ ৩৭ শতাংশ নিৰ্বাচনী বণ্ডৰ  অনুদান ফিউচাৰ গেমিঙৰ পৰা আহিছিল। নিৰ্বাচন আয়োগে শনিবাৰে লোকসভা নিৰ্বাচন ২০২৪ ৰ সময়সূচী ঘোষণা কৰিছে। নিৰ্বাচনী  আচৰণ বিধি কাৰ্যকৰী হোৱাৰ পিছতে  নিৰ্বাচনী বণ্ডৰ বিৱৰণ আজি প্ৰকাশ কৰা হৈছে।