নিৰ্বাচনী জালিয়াতিৰ গোচৰত ম্যানমাৰৰ আদালতে ৩ বছৰৰ কাৰাদণ্ড শাস্তি বিহিলে আং ছান চ্যু কীক

ডিজিটেল ডেস্ক : ম্যানমাৰৰ এখন আদালতে শুকুৰবাৰে দুৰ্নীতিৰ দোষী সাব্যস্ত হোৱাৰ পাছতে নেতা আং ছান চ্যু কীক তিনি বছৰৰ কাৰাদণ্ডৰ শাস্তি প্ৰদান কৰে। ন’বেল বঁটা বিজয়ী তথা ম্যানমাৰৰ সামৰিক শাসনৰ অন্যতম কঠোৰ বিৰোধী ৭৭ বছৰীয়া আং ছান চ্যু কীয়ে নিজৰ বিৰুদ্ধে উত্থাপিত অভিযোগক ভিত্তিহীন বুলি অভিহিত কৰিছিল। গণতন্ত্ৰৰ বাবে অহিংস সংগ্ৰামৰ বাবে চ্যু কীক ন’বেল বঁটা প্ৰদান কৰা হৈছিল।

 ২০২০ চনৰ সাধাৰণ নিৰ্বাচনত চ্যু কীৰ দলটোৱে বিপুল সংখ্যাগৰিষ্ঠতা লাভ কৰিছিল। ২০২১ চনৰ ১ ফেব্ৰুৱাৰীত চ্যু কী-নিৰ্বাচিত চৰকাৰক ক্ষমতাচ্যুত কৰি সামৰিক বাহিনীয়ে ক্ষমতা দখল কৰে। সেই সময়ছোৱাত চ্যু কীৰ বিৰুদ্ধে ভোটদানৰ জালিয়াতিৰ অভিযোগ উত্থাপন কৰা হৈছিল। কিন্তু স্বতন্ত্ৰ নিৰ্বাচনী পৰ্যবেক্ষকে কোনো প্ৰমাণ বিচাৰি নাপালে। তেওঁৰ পূৰ্বৰ চৰকাৰৰ দুজন জ্যেষ্ঠ সদস্য এই গোচৰৰ সহপ্ৰতিবাদকাৰী আছিল আৰু তেওঁলোকক ৩ বছৰৰ কাৰাদণ্ড বিহিছিল।

 দুৰ্নীতিৰ গোচৰত চলিত বৰ্ষৰ আগষ্ট মাহত তেওঁক শাস্তি প্ৰদান কৰা হৈছিল। ম্যানমাৰৰ এখন বিশেষ আদালতে চলিত আগষ্টৰ আৰম্ভণিতে আং ছান চ্যু কীক দুৰ্নীতিৰ চাৰিটা গোচৰত দোষী সাব্যস্ত হোৱাৰ পাছত ছয় বছৰৰ কাৰাদণ্ডৰ শাস্তি প্ৰদান কৰিছিল। ডাউ খিন’ছ ফাউণ্ডেছনৰ ধনৰ অপব্যৱহাৰৰ অভিযোগ উত্থাপন হৈছিল তেওঁৰ বিৰুদ্ধে। এই ভেটিটো স্বাস্থ্য আৰু শিক্ষাৰ প্ৰসাৰৰ বাবে প্ৰতিষ্ঠা কৰা হৈছিল। কিন্তু সেই সময়ছোৱাত আং ছান চু্য কীয়ে নিজৰ বিৰুদ্ধে উত্থাপিত অভিযোগক অৰ্থহীন বুলি অভিহিত কৰিছিল।কিন্তু তেওঁ সকলো অভিযোগ অস্বীকাৰ কৰিছিল।