ডিজিটেল ডেস্ক: অব্যাহত আছে ৰাহুল গান্ধীৰ নেতৃত্বত ভাৰত জোড়ো ন্যায় যাত্ৰা৷ ঘৃণাৰ বজাৰত প্ৰেমৰ দোকান খোলাৰ অংগীকাৰ লোৱা ৰাহুল গান্ধীৰ ন্যায় যাত্ৰাই পুনৰ মুখামুখি হ’ল সুতীব্ৰ ঘৃণাৰ!
কংগ্ৰেছ নেতা ৰাহুল গান্ধীয়ে শনিবাৰে তেওঁৰ ভাৰত জোড়ো ন্যায় যাত্ৰাৰ সৈতে বাৰাণসীত উপস্থিত হৈছিল। তাত তেওঁ প্ৰায় ১২ কিলোমিটাৰ ৰোড শ্ব’ কৰিছিল৷ শোভাযাত্ৰাটোত জনসমাগম হৈছিল অভূতপূৰ্ব৷ ৰাহুল গান্ধীক ওচৰৰ পৰা চাবলৈ হেতাওপৰা লগাইছিল কংগ্ৰেছ কৰ্মী আৰু ৰাহুল গান্ধীৰ অনুৰাগীসকলে৷
সেইখিনিলৈ ঠিকেই আছিল৷ কিন্তু, যেতিয়া যাত্ৰাটো পাৰ হৈ গৈছিল, তাৰ পাছতেই কিছুমান বিজেপি কৰ্মীয়ে ৫১ লিটাৰ গংগা পানীৰে সেই ঠাই ধুই কংগ্ৰেছ আৰু ৰাহুল গান্ধী বিৰোধী শ্লোগানেৰে পৰিবেশ উত্তাল কৰি তুলিছিল৷
ৰাহুল গান্ধীৰ ন্যায় যাত্ৰাৰ পাছত বিজেপি কৰ্মীসকলে গোদাউলিয়াৰ নন্দী চাৰিআলিৰ ৰাজপথ ৫১ লিটাৰ গংগা পানীৰে ধুইছিল। বিজেপি কৰ্মীসকলে কয় যে ৰাহুল গান্ধীয়ে চাৰিআলিটো দূষিত কৰিছে। সনাতন ধৰ্মৰ ওপৰত কোনো বিশ্বাস নথকা মাংস খোৱা ব্যক্তি এজন ইয়ালৈ আহিছে আৰু ঠাইখিনি দূষিত কৰিছে, সেয়ে আমি ৫১ লিটাৰ গংগা পানীৰে পবিত্ৰ কৰিছোঁ৷
আনহাতে, আমেঠি, ৰায়বৰেলী আৰু লক্ষ্ণৌপথত যাত্ৰাৰ প্ৰস্তুতি চূড়ান্ত কৰা হৈছে। যাত্ৰাটো ২১ ফেব্ৰুৱাৰীত কানপুৰত উপস্থিত হ'ব৷ যাত্ৰাটো ২৪ ফেব্ৰুৱাৰীত মোৰাদাবাদৰ পৰা পুনৰ আৰম্ভ হ'ব আৰু ৰাজস্থান পাবলৈ আমৰোহা, সম্ভাল, আলিগড়, হাতৰাছ, আগ্ৰাৰ মাজেৰে পাৰ হ'ব।
Continue Reading
