ডিজিটেল ডেস্কঃ পুনৰ আইনী জটিলতাৰ মাজত সোমাই পৰিছে ‘আদিপুৰুষ’। ওম ৰাউতৰ ছবিখনৰ নতুন পোষ্টাৰ মুক্তি পোৱাৰ পিছত পুনৰ বিপদত পৰিছে। সনাতন হিন্দুৰ আৱেগক আঘাত দিয়াৰ অভিযোগ তুলি বোম্বাই আদালতত গোচৰ ৰুজু কৰা হৈছে।
কিছুদিন পূৰ্বে মুক্তি পালে ‘আদিপুৰুষ’ চিনেমাখনৰ নতুন পোষ্টাৰ। নতুন পোষ্টাৰখনত ৰামচন্দ্ৰৰ দুয়োফালে আছে ভাতৃ লক্ষ্মণ আৰু পত্নী সীতা। ৰামচন্দ্ৰৰ চৰণত বহি আছে হনুমান।
ওম ৰাউত পৰিচালিত ছবিখনত দক্ষিণৰ তাৰকা অভিনেতা প্ৰভাছে ৰামচন্দ্ৰৰ চৰিত্ৰত অভিনয় কৰাৰ বিপৰীতে বলীউডৰ অভিনেত্ৰী কৃতি শ্বেননে সীতাৰ চৰিত্ৰত অভিনয় কৰিছে। 'পেয়াৰ কা পঞ্চনামা'ৰ ফেম অভিনেতা ছানী সিঙক লক্ষ্মণৰ চৰিত্ৰত দেখা যাব। বলীউডৰ তাৰকা ছাইফ আলী খানে ৰাৱণৰ চৰিত্ৰত অভিনয় কৰিছে। কিন্তু ছবিখনৰ নতুন পোষ্টাৰত নাই ৰাৱণৰ ছৱি৷
যোৱা বছৰ ‘আদিপুৰুষ’ৰ টিজাৰ মুক্তি পোৱাৰ পাছত ৰাৱণৰ চৰিত্ৰত চৈফ আলী খানৰ সাজ-পোছাক আৰু সজ্জাই এক বৃহৎ বিতৰ্কৰ সৃষ্টি কৰিছিল। সেয়ে ইচ্ছাকৃতভাৱে পোষ্টাৰখনৰ পৰা ৰাৱণক বাদ দিয়া হৈছে। ইয়াৰ পিছতো ‘আদিপুৰুষ’-এ পুনৰ আইনী জটিলতাৰ সন্মুখীন হ’বলগীয়া হ’ল।
সঞ্জয় দীননাথ তিৱাৰী নামৰ এজন লোকে অভিযোগ কৰিছে যে ‘আদিপুৰুষ’ৰ পোষ্টাৰ ইমেজত ৰাম বা লক্ষ্মণে লগুণ পিন্ধা নাই। সঞ্জয়ে অভিযোগ কৰে যে হিন্দু ধৰ্মত লগুণৰ গুৰুত্ব অপৰিসীম।
কেৱল সেয়াই নহয়, নিজকে পৰম্পৰাগত হিন্দু বুলি দাবী কৰা সঞ্জয়ে অভিযোগ কৰিছে যে ‘আদিপুৰুষ’ৰ পোষ্টাৰখনত সীতাৰ কপালতো সেন্দূৰৰ ৰং নাই। এনে অভিযোগ লৈ তেওঁ অধিবক্তা আশীষ ৰায় আৰু পংকজ মিশ্ৰৰ জৰিয়তে বম্বে উচ্চ ন্যায়ালয়ৰ কাষ চাপিছে।
Continue Reading
