ডিজিটেল ডেস্কঃ অমিতাভ বচ্চন আৰু ৰেখাৰ ‘চিলচিলা’ৰ সেই বিখ্যাত গীতৰ দৃশ্যটোৰ টিউলিপ বাগিচাখনৰ কথা মনত আছেনে? তেনে এখন টিউলিপ বাগিচা আছে শ্ৰীনগৰত।
শেহতীয়াকৈ জম্মু-কাশ্মীৰৰ পৰ্যটন বিভাগৰ উদ্যোগত এছিয়াৰ সৰ্ববৃহৎ টিউলিপ বাগিচা ‘ইন্দিৰা গান্ধী সোঁৱৰণী টিউলিপ বাগিচা’ত আৰম্ভ হৈছে ‘টিউলিপ মহোৎসৱ’। শ্ৰীনগৰত অৱস্থিত এই বাগিচাখন দেওবাৰৰ পৰা জনসাধাৰণৰ বাবে মুকলি কৰা হৈছে।
প্ৰায় ১৫ লাখ পাহ টিউলিপ একেলগে দেখা যায় শ্ৰীনগৰৰ দল হ্ৰদ আৰু জবৰৱান পাহাৰত। প্ৰতি বছৰে এই সময়ত বাগিচাখন টিউলিপেৰে ভৰি থাকে। গতিকে এই সময়ত পৰ্যটকৰ ভিৰটোও দেখা যায়।
শ্ৰীনগৰৰ এই টিউলিপ বাগিচাখনৰ ভাৰপ্ৰাপ্ত বিষয়া ইনাম-উল-ৰেহমানে কয়- ''এই সময়ত দেশৰ বিভিন্ন প্ৰান্তৰ পৰা বিদেশৰ পৰা পৰ্যটক শ্ৰীনগৰ ভ্ৰমণ কৰিবলৈ আহে। বাগিচাবোৰ সেইবোৰ মনত ৰাখি ডিজাইন কৰা হয়।"
শ্ৰীনগৰ পৰ্যটন সংস্থাৰ ৱেবছাইট অনুসৰি ২০০৭ চনত এই বাগিচাখন পৰ্যটন উদ্যোগৰ প্ৰচাৰ আৰু সম্প্ৰসাৰণৰ উদ্দেশ্যে মুকলি কৰা হৈছিল।
Continue Reading
