ডিজিটেল ডেস্কঃ নিয়ম ভংগ কৰি এতিয়া ক্লাবৰ ৰোষত পৰিছে লিঅনেল মেছি৷ অনুমতি অবিহনে মেছিয়ে চৌদি আৰৱলৈ যোৱাৰ বাবেই পিএছজিয়ে তেওঁক ক্লাবটোৰ নিয়ম উলংঘা কৰাৰ অভিযোগত শাস্তি বিহিছে। পেৰিছ ছেইণ্ট জাৰ্মেইনে (পিএছজি) তেওঁক দুসপ্তাহৰ বাবে নিলম্বিত কৰিছিল।
বিশ্ববিজয়ী আৰ্জেণ্টিনাৰ তাৰকাগৰাকীয়ে ছিজনৰ শেষত পিএছজিক বিদায় জনাব পাৰে। তেওঁ বাৰ্চিলোনালৈ উভতি যাব পাৰে বুলিও চৰ্চা চলিছে। একে সময়তে, ক্ৰিষ্টিয়ানো ৰোনাল্ডোৰ দৰে মেছিয়েও চৌদি আৰৱৰ এটা ক্লাবত যোগদান কৰাৰ সম্ভাৱনা নুই কৰিব নোৱাৰি বুলি বহুতে আলোচনা কৰিছে। শেহতীয়াকৈ লিয়োনেল মেছিয়ে তেওঁ চুক্তিবদ্ধ হোৱা ক্লাব পিএছজিৰ অনুমতি অবিহনে চৌদি আৰৱলৈ ৰাওনা হয়। এই কথাে ক্ষুদ্ধ হৈ পৰিছে ক্লাবৰ বিষয়াসকল।
ফৰাচী সংবাদ মাধ্যমৰ এক প্ৰতিবেদন অনুসৰি শাস্তি হিচাবে মেছিয়ে পিএছজিৰ হৈ পৰৱৰ্তী দুখন লিগ মেচত খেলিব নোৱাৰিব। তেওঁ দুসপ্তাহৰ বাবে দলটোৰ বাবে অনুশীলনো কৰিব নোৱাৰিব। ইয়াৰ বাহিৰেও চুপাৰষ্টাৰজনক এই দুসপ্তাহৰ বাবে দৰমহা দিয়া নহ'ব। যদি সকলো ঠিকে থাকে, মেছিক ২১ মে'ত পুনৰ খেলিবলৈ অনুমতি দিয়া হ'ব পাৰে৷
উল্লেখ্য মেছি হৈছে চৌদি আৰৱৰ পৰ্যটন ৰাষ্ট্ৰদূত৷ । সেয়েহে তেওঁ বিজ্ঞাপন সম্পৰ্কীয় কামৰ বাবে ৰিয়াধলৈ গৈছিল৷ সোমবাৰে ছ'চিয়েল মিডিয়াত মেছিৰ ৰিয়াধৰ ফটো প্ৰকাশ পাইছিল। কিন্তু ক্লাবৰ অনুমতি অবিহনে এনেদৰে মেছিয়ে ৰিয়াধলৈ যোৱাৰ কথাটো সহজভাবে লোৱা নাই ক্লাব কৰ্তৃপক্ষই। ক্লাব কৰ্তৃপক্ষই অৱশ্যে বিষয়টোত ৰাজহুৱাভাৱে মন্তব্য দিব বিচৰা নাই। অৱশ্যে, এনে পদক্ষেপ গ্ৰহণ কৰি, পিএছজিয়ে স্পষ্ট কৰি দিছে যে কোনো তাৰকা ক্লাবৰ নিয়মৰ উৰ্ধত নহয়।
Continue Reading
