ডিজিটেল ডেস্কঃ অশান্ত মণিপুৰত আজি সন্ধিয়াও সংঘটিত হৈছে গুলীচালনাৰ ঘটনা। এনে সময়তে কেন্দ্ৰীয় গৃহমন্ত্ৰী অমিত শ্বাহে ২৪ জুনৰ আবেলি ৩ বজাত মণিপুৰৰ পৰিস্থিতিকলৈ নতুন দিল্লীত এখন সৰ্বদলীয় বৈঠক আহ্বান কৰিছে।
গৃহ মন্ত্ৰালয়ে প্ৰকাশ কৰা মতে কেন্দ্ৰীয় গৃহ মন্ত্ৰী অমিত শ্বাহে শনিবাৰে হিংসাপীড়িত মণিপুৰৰ পৰিস্থিতি ৰ বিষয়ে আলোচনা কৰিবলৈ সৰ্বদলীয় বৈঠক আহ্বান কৰিছে ।উল্লেখ্য শ্বাহে যোৱা মাহত মণিপুৰ ভ্ৰমণ কৰিছিল আৰু শান্তি সমিতি আদিও গঠন কৰি দিছিল। কিন্তু ইমানৰ পিছতো শান্ত হোৱা নাই মণিপুৰ। এতিয়ালৈকে ৰাজ্য খনত সংঘটিত গোষ্ঠী সংঘৰ্ষত ১১৫ জন লোক নিহত হোৱাৰ লগতে কমেও ৪০,০০০ লোকক গৃহহাৰা হৈ পৰিছে।
বিভিন্ন পৰ্যায়ত মেইটেই আৰু কুকি দুয়োটা সম্প্ৰদায়ৰ প্ৰতিনিধিৰ সৈতে কেইবাবাৰো বৈঠক অনুষ্ঠিত কৰা হৈছে যদিও হিংসা শাম কটা নাই। মণিপুৰত অস্থিৰতা সৃষ্টি হোৱাৰ পিছত ৰাজ্যজুৰি কাৰফিউ জাৰি কৰা হৈছিল। কেন্দ্ৰীয় গৃহ মন্ত্ৰী অমিত শ্বাহে নিজেই ৰাজ্যখনলৈ গৈ পৰিস্থিতি নিয়ন্ত্ৰণ কৰিবলৈ চেষ্টা কৰিছিল।
যদিও অস্থায়ীভাৱে হ্ৰাস পাইছে, মণিপুৰত পুনৰ হিংসা বিয়পি পৰাৰ আশংকা সমূলি দূৰ হোৱা নাই। বিৰোধীয়েও মণিপুৰত হিংসা বন্ধ কৰিবলৈ তাৎক্ষণিক ব্যৱস্থা গ্ৰহণৰ দাবী জনাই আহিছে।
আৰু পঢ়ক : পাটনাত বিৰোধীৰ সভা সমাপ্তঃ জুলাইৰ আৰম্ভনিতে মল্লিকাৰ্জুন খাৰ্গেৰ নেতৃত্বত ছিমলাত পৰৱৰ্তী বৈঠক
