অসমৰ এক কোটি বাৰ লাখ বিঘা ভূমি খহনীয়াত জাহ গৈছে: সংসদত সৰব প্ৰদ্যুৎ বৰদলৈ

ডিজিটেল ডেস্ক: অসমৰ নৈপৰীয়া অঞ্চলত হৈ থকা গৰাখহনীয়া সমস্যাক লৈ লোকসভাত সৰব হ’ল নগাঁৱৰ কংগ্ৰেছ সাংসদ প্ৰদ্যুৎ বৰদলৈ৷ সাংসদ বৰদলৈয়ে পুনৰ এবাৰ সংসদত ‘Rule ৩৭৭’ৰ যোগেদি এই গৰাখহনীয়া সমস্যাৰ ওপৰত এটা আলোচনাৰ দাবী উত্থাপন কৰিছে৷ গৰাখহনীয়া সমস্যাৰ সবিশেষ জনাই নগাঁও লোকসভা সমষ্টিৰ সাংসদগৰাকীয়ে লোকসভাৰ ছেক্ৰেটেৰী-জেনেৰেললৈ এখন পত্ৰও প্ৰেৰণ কৰিছে৷ সাংসদ বৰদলৈয়ে কয়, বিগত দুবছৰে বিশেষকৈ জলশক্তি বিভাগৰ বিভাগীয় মন্ত্ৰী আৰু শীৰ্ষ বিষয়াসকলক বুজাবলৈ চেষ্টা কৰিছোঁ যে অসমৰ বানতকৈ এতিয়া বেছি গুৰুত্বপূৰ্ণ সমস্যাটো হ’ল ব্ৰহ্মপুত্ৰকে আদি কৰি আমাৰ নদীবিলাকত চলি থকা গৰাখহনীয়াৰ বিভীষিকা। তথ্য অনুসৰি, ১৯৫৪ চনৰ পৰা এতিয়ালৈকে অসমত ৪.৫ লাখ হেক্টৰ মাটিত থকা (মানে প্ৰায় ১,১২,৩৬,০০০ বিঘা) কৃষিভূমি, গছ-গছনি আৰু মানুহৰ ঘৰ-বাৰী, সম্পত্তি আদি নদীৰ বুকুত জাহ গৈছে। সাংসদগৰাকীয়ে কয়, মোৰ সংসদীয় এলেকাৰ লাহৰীঘাট আৰু জাগীৰোড বিধানসভা সমষ্টিতে আটাইতকৈ বেছি গৰাখহনীয়াৰ সমস্যাই গা কৰি উঠিছে। এই খহনীয়াৰ বাবেই অসমৰ বিভিন্ন চৰ-চাপৰি আৰু নদীৰ পাৰত থকা হাজাৰ-হাজাৰ লোক দৈনিক গৃহহীন হৈ আহিছে। নদীয়ে গৃহহাৰা কৰা এইসকল লোকে নিগাজীকৈ বসতি স্থাপন কৰিবলৈ এতিয়া দিহিঙে-দিপাঙে ঘূৰি ফুৰে। গোলকীয় উষ্ণতাৰ ফলত বিগত ৭/৮ বছৰৰ পৰা ঘনাই বতৰ সলনি হৈ থকা কাৰণে চীন আৰু লাডাখত ব্ৰহ্মপুত্ৰৰ গতি পুনৰ্বিন্যাস কৰা স্বাভাৱিক কাম-কাজ আৰু অসমৰ নামনিলৈ বৈ অহা নদীৰ পানীৰ পৰিমাণৰ বঢ়া-টুটাৰ অস্বাভাৱিক তাৰতম্যৰ বাবেই এই গৰাখহনীয়াৰ প্ৰকোপ বৃদ্ধি পাইছে। সাংসদ প্ৰদ্যুৎ বৰদলৈয়ে অভিযোগ কৰি কয় যে, আগতে বানপানীৰ লগতে সামগ্ৰিকভাৱে গৰাখহনীয়া নিয়ন্ত্ৰণৰ বাবে কেন্দ্ৰীয় চৰকাৰে ‘Flood Management Programme’ শিতানত কেন্দ্ৰীয় চৰকাৰে অসমলৈ ধন আবণ্টন কৰিছিল৷ পিছে, ২০১৫ চনৰ পৰা মোদী চৰকাৰে সেয়া বন্ধ কৰি দিছে।