অস্ত্ৰও আহে বিএমডব্লিউতহে : ব্যৱসায়ী, ঠিকাদাৰক লুটি বিলাসী জীৱনৰ সোৱাদ!

ডিজিটেল ডেস্ক : বিলাসীতাৰ পৰিচয় যেন বাহনতে! বহু প্ৰভাৱশালী তথা ধৰ্নাঢ্য ব্যক্তিৰ ঘৰত প্ৰায়ে দেখা যায় একো একোখন বিলাসী বাহন৷ কিন্তু এইবাৰ নিজৰ চখ পূৰাবলৈ নহয় মাৰণাস্ত্ৰৰ কঢ়িয়াবলৈহে ব্যৱহাৰ কৰিছে ব্যয়বহুল বাহন৷
জানিব পৰা মতে ঝাৰখণ্ডৰ মাওবাদীসকলে ব্যৱসায়ী আৰু ঠিকাদাৰৰ পৰা সংগ্ৰহ কৰা ধনেৰে ক্ৰয় কৰিছে বিলাসী বাহন৷ শেহতীয়াকৈ ৰাঁচীৰ পিপলছ লিবাৰেচন ফ্ৰণ্ট অৱ ইণ্ডিয়াৰ (পিএলএফআই) কেডাৰসকলক গ্ৰেপ্তাৰ কৰাৰ পাছতে প্ৰকাশ পাইছে এই তথ্য৷ ৰাজ্যখনৰ বাওঁপন্থী উগ্ৰপন্থীসকলৰ বিলাসী জীৱন কটাই অহাৰ উপৰি শীৰ্ষ মাওবাদীসকলে ১.৫ কোটি টকালৈকে অতি ব্যয়বহুল বাহন ব্যৱহাৰ কৰি অহা পোহৰলৈ আহিছে৷

লক্ষ্যণীয়ভাৱে, এই বাহনবোৰ বিদ্ৰোহীসকলে স্থানীয় ব্যৱসায়ীসকলৰ পৰা শুল্ক সংগ্ৰহ আৰু ইয়াৰ কেডাৰসকলক অস্ত্ৰ যোগান ধৰাৰ বাবে ব্যৱহাৰ কৰি আহিছে। ৰাঁচী আৰক্ষীয়ে জাৰি কৰা এক চৰকাৰী তথ্য অনুসৰি, এছএছপিয়ে এক গোপন সূত্ৰ লাভ কৰে যে ধুৰৱাৰ ওচৰত অস্ত্ৰ-শস্ত্ৰ আৰু গোলাবাৰুদ যোগান ধৰাৰ সৈতে জড়িত কিছুমান লোকক দেখা গৈছে। বৃহস্পতিবাৰে ৰাঁচীৰ ৰিং ৰোডৰ ওচৰৰ এটা পথৰ কাষৰ ধাবাত এটা অভিযান চলোৱা হৈছিল য’ত আৰ্য কুমাৰ সিং আৰু উজ্জ্বল কুমাৰ চাহুক আমিৰচান্দ কুমাৰৰ সৈতে গ্ৰেপ্তাৰ কৰা হৈছিল৷ যিসকলে পিএলএফআই কেডাৰৰ বাবে চিমকাৰ্ড প্ৰাপ্ত কৰিবলৈ আহিছিল।

ইপিনে আন তিনিজন মাওবাদী নিবেশ কুমাৰ, শুভম কুমাৰ আৰু ধ্ৰুৱ কুমাৰে এখন বিএমডব্লিউ গাড়ী আৰু থাৰ জীপত পলাই যোৱাৰো খবৰ লাভ কৰিছে। খবৰ অনুসৰি তেওঁলোক পিএলএফআইৰ মুৰব্বী দিনেশ গোপেৰ দলৰ অন্তৰ্ভুক্ত। পাছলৈ আমিৰচান্দৰ পৰা প্ৰাপ্ত তথ্যৰ ওপৰত, কেইবাটাও উচ্চমানৰ তাঁবু, শ্লিপিং বেগ আৰু মাওবাদী পত্ৰিকাৰ লগতে নগদ ৩.২৫ লাখ টকা উদ্ধাৰ কৰা হয়। পলায়নৰ বাবে বাকী তিনিজনে ব্যৱহাৰ কৰা গাড়ী আৰু জীপখনো আৰক্ষীয়ে জব্দ কৰিছিল।

তেওঁলোকৰ জেৰাৰ সময়ত গ্ৰেপ্তাৰ কৰা মাওবাদীকেইটাই আৰক্ষীক কৈছিল যে তেওঁলোকে গোপৰ বাবে কাম কৰে। লগতে কৈছিল যে সামগ্ৰী তথা মাৰণাস্ত্ৰসমূহ এঠাইৰ পৰা আন ঠাইলৈ স্থানান্তৰ কৰিবলৈ বিলাসী বাহন ব্যৱহাৰ কৰা হয় আৰু ধ্ৰুৱ আৰু শুভম একেটা দলৰ।