অৰুণাচল প্ৰদেশ ভাৰতৰ অবিচ্ছেদ্য অংগ, চীনা 'আক্ৰমণ'ক গৰিহণা দি আমেৰিকা যুক্তৰাষ্ট্ৰৰ চিনেটে গৃহীত কৰিলে প্ৰস্তাৱ

জুন মাহত প্ৰধানমন্ত্ৰী মোদীৰ আমেৰিকা ভ্ৰমণৰ পূৰ্বে বিডেন চৰকাৰে চীনলৈ এক শক্তিশালী বাৰ্তা প্ৰেৰণ কৰি তেওঁলোকক বিশ্বৰ ভূ-কৌশলগত পৰিস্থিতিৰ কথা সোঁৱৰাই দিছিল।  লাডাখত সামৰিক আক্ৰমণ চলোৱা চীনক সকিয়াই  দি আমেৰিকাই স্পষ্ট কৰি দিছিল  যে ৱাশ্বিংটন ভাৰতৰ  পক্ষত আছে। এই সময়তে  চিনেট সমিতিয়ে গৃহীত কৰা  প্ৰস্তাৱে এতিয়া ভাৰতৰ স্থিতি আৰু অধিক মজবুত কৰি তুলিলে।  প্ৰস্তাৱটো চিনেটৰ জেফ মাৰ্কলি, বিল হেগৰ্টি, টিম কেইন আৰু ক্ৰিছ ভান হেলেনে উত্থাপন কৰিছিল। প্ৰস্তাৱটোত কোৱা হৈছে "অৰুণাচল প্ৰদেশ ভাৰতৰ এক অবিচ্ছেদ্য অংগ কথাষাৰত আমেৰিকা যুক্তৰাষ্ট্ৰৰ স্থিতি দৃঢ়। আমেৰিকা যুক্তৰাষ্ট্ৰই ভাৰতীয় প্ৰদেশৰ প্ৰকৃত নিয়ন্ত্ৰণ ৰেখাত শান্তি বিঘ্নিত কৰিবলৈ গণ প্ৰজাতন্ত্ৰী চীনৰ আক্ৰমণাত্মক মনোভাৱক গৰিহণা দিয়ে।’’ প্ৰস্তাৱটোত এইটোও অভিযোগ কৰা হৈছে যে অৰুণাচল প্ৰদেশৰ কিছু অংশ চীনা সেনাই দখল কৰি ৰাখিছে।

লাডাখৰ দৰে অৰুণাচল প্ৰদেশৰ কিছুঅঞ্চলক লৈ নতুন দিল্লী আৰু বেইজিঙৰ মাজত দশকৰ পিছত দশক ধৰি সংঘাত চলি আছে। যোৱা দুবছৰত টাৱাঙত দুয়োখন দেশৰ  সৈন্যৰ মাজত কেইবাটাও সংঘৰ্ষ হৈছে। এই মাহৰ আৰম্ভণিতে চীনৰ ৰাষ্ট্ৰপতি জি জিনপিঙৰ চৰকাৰে নতুন দিল্লীৰ আপত্তি আওকাণ  কৰি অৰুণাচল প্ৰদেশৰ ১১ টা অঞ্চলৰ নাম সলনি কৰিছে। এই সন্দৰ্ভত বহু  কূটনীতিবিদে ধাৰণা কৰিছে যে   আমেৰিকা যুক্তৰাষ্ট্ৰৰ চিনেট সমিতিয়ে গ্ৰহণ কৰা এই প্ৰস্তাৱৰ যথেষ্ট গুৰুত্ব আছে। তেওঁলোকৰ মতে চিনেটৰ প্ৰস্তাৱটোৱে সীমান্তক লৈ চীনৰ সৈতে চলি থকা সংঘাতৰ প্ৰসংগত  আন্তঃৰাষ্ট্ৰীয় পৰ্যায়ত ভাৰতৰ স্থিতি শক্তিশালী কৰি তুলিব ।