পাকিস্তানৰ পৰা জয়লাভ কৰা বাগীত উঠি কৰ্তব্য পথত উপস্থিত ৰাষ্ট্ৰপতি মূৰ্মু

১৯৮৪ চনত প্ৰধানমন্ত্ৰী ইন্দিৰা গান্ধীক নিজৰ দেহৰক্ষীয়ে গুলীয়াই হত্যা কৰাৰ পাছত ৰাষ্ট্ৰপতিৰ নিৰাপত্তাৰ উদ্ধৃতি দি গাড়ীখনৰ ব্যৱহাৰ বন্ধ কৰি দিয়া হয়। ৩০ বছৰৰ পাছত ৰাষ্ট্ৰপতি প্ৰণৱ মুখাৰ্জীয়ে ইয়াক ব্যৱহাৰ কৰি বিটিং ৰিট্ৰিটলৈ গৈছিল। ইয়াৰ পাছত ৰাষ্ট্ৰপতি ৰামনাথ কোবিন্দেও শপত গ্ৰহণৰ সময়ত তাত উঠিছিল যদিও গণৰাজ্য দিৱস উদযাপনলৈ যাবলৈ ইয়াৰ ব্যৱহাৰ কৰা হোৱা নাছিল। এতিয়া ৪০ বছৰৰ পাছত এই গাড়ীখন আকৌ এবাৰ ঘূৰি আহিছে৷

১৯৪৭ চনৰ ১৫ আগষ্টত দেশৰ স্বাধীনতা লাভৰ সময়ত দুয়োখন দেশৰ মাজত মাটিৰ পৰা আৰম্ভ কৰি সেনাবাহিনীলৈকে সকলো বস্তু বিতৰণৰ নিয়মৰ সিদ্ধান্ত লোৱা হৈছিল। ইয়াক সহজ কৰি তুলিবলৈ প্ৰতিনিধি নিযুক্তি দিয়া হৈছিল। ভাৰতৰ প্ৰতিনিধি আছিল এইচ এম পেটেল, আনহাতে পাকিস্তানৰ প্ৰতিনিধি আছিল চৌধুৰী মহম্মদ আলী। জনসংখ্যাৰ ভিত্তিত সকলো বিতৰণ কৰা হৈছিল। উদাহৰণস্বৰূপে ৰাষ্ট্ৰপতিৰ দেহৰক্ষীসকলক ২:১ অনুপাতত ভাগ কৰা হৈছিল। ৰাষ্ট্ৰপতিৰ গাড়ীৰ কথা অহাত দুয়োখন দেশৰ প্ৰতিনিধিৰ মাজত বিতৰ্ক আৰম্ভ হ’ল৷সমস্যাটো জটিল হৈ পৰা দেখি দেহৰক্ষীৰ মুখ্য অধিনায়কে সমাধানৰ পৰামৰ্শ দিলে, যাৰ ওপৰত দুয়োজন প্ৰতিনিধিয়ে সন্মতি দিলে। কমাণ্ডেণ্টে গাড়ীখনৰ সঠিক মালিক নিৰ্ণয় কৰিবলৈ মুদ্ৰা টছ কৰিবলৈ ক’লে। এই টছ সংঘটিত হৈছিল ৰাষ্ট্ৰপতিৰ দেহৰক্ষী ৰেজিমেণ্টৰ কমাণ্ডেণ্ট লেফটেনেণ্ট কৰ্ণেল ঠাকুৰ গোবিন্দ সিং আৰু পাকিস্তানৰ ইয়াকুব খানৰ মাজত। ভাৰতে টছত জয়লাভ কৰিছিল আৰু তেতিয়াৰ পৰা আজিলৈকে এই বাগীখনেই হৈছে ৰাষ্ট্ৰপতি ভৱনৰ গৌৰৱ।

ব্ৰিটিছ শাসনৰ সময়ত এই বাগী ভাইচৰয়ক দিয়া হৈছিল যদিও স্বাধীনতাৰ পাছত বিশেষ অনুষ্ঠানত ৰাষ্ট্ৰপতিৰ পৰিবহণৰ বাবে ইয়াৰ ব্যৱহাৰ আৰম্ভ হৈছিল। ১৯৫০ চনত গণৰাজ্য দিৱস উপলক্ষে ভাৰতৰ প্ৰথম ৰাষ্ট্ৰপতি ড° ৰাজেন্দ্ৰ প্ৰসাদে প্ৰথমবাৰৰ বাবে ইয়াক ব্যৱহাৰ কৰিছিল। ইয়াৰ পাছত এই বাগীখনেৰে বহু ৰাষ্ট্ৰপতিক তেওঁলোকৰ ৰাজপ্ৰসাদৰ পৰা গণৰাজ্য দিৱস উদযাপনৰ স্থানলৈ অনাৰ কাম আৰম্ভ হয়। এই ক’লা ৰঙৰ গাড়ীখনত সোণৰ প্লেট কৰা হয় আৰু ইয়াক টানিবলৈ বিশেষ ধৰণৰ ঘোঁৰা বাছি লোৱা হয়। স্বাধীনতাৰ আগতে ইয়াক ৬টা অষ্ট্ৰেলিয়ান ঘোঁৰাই টানিছিল যদিও এতিয়া ইয়াক মাত্ৰ ৪টা ঘোঁৰাইহে টানিছে। ইয়াৰ ওপৰত ভাৰতৰ জাতীয় প্ৰতীকো খোদিত কৰা হৈছে।

১৯৮৪ চনত প্ৰাক্তন প্ৰধানমন্ত্ৰী ইন্দিৰা গান্ধীৰ হত্যাৰ পাছত ৰাষ্ট্ৰপতিৰ নিৰাপত্তাৰ দোহাই দি গাড়ীখনৰ ব্যৱহাৰ বন্ধ কৰি দিয়া হয়। তেতিয়াৰ পৰাই বাগীৰ সলনি বুলেটপ্ৰুফ বাহন ব্যৱহাৰ হ’বলৈ ধৰা হয়। প্ৰায় ৩০ বছৰ ধৰি এই বগীখন ব্যৱহাৰ নকৰিলেও ৰক্ষণাবেক্ষণৰ ব্যৱস্থা কৰা হৈছিল, আনহাতে ২০০২ চনৰ পৰা ২০০৭ চনলৈকে ভাৰতৰ ৰাষ্ট্ৰপতি ড০ এ পি জে আব্দুল কালামে বাগীখনত উঠি ৰাষ্ট্ৰপতি ভৱন কমপ্লেক্সত ঘূৰি ফুৰিছিল।