ডিজিটেল ডেস্ক: অযোধ্যাৰ ৰাম মন্দিৰৰ অভিষেক অনুষ্ঠান বৰ্জন কৰাৰ পাছত পুনৰ মুখ খুলিছে চিপিএম নেতা সীতাৰাম য়েচুৰীয়ে৷ অভিষেকৰ মাত্ৰ কিছুদিন পূৰ্বে গুৰুতৰ অভিযোগেৰে দেশজুৰি বিতৰ্কৰ সূচনা কৰিছে বাঁওপন্থী নেতাগৰাকীয়ে৷
য়েচুৰীয়ে বুধবাৰে অভিযোগ কৰে যে অযোধ্যাৰ ৰাম মন্দিৰৰ ৰামলালাৰ অভিষেক অনুষ্ঠানৰ নামত দেশখনক মেৰুকৰণ কৰাৰ চেষ্টা কৰা হৈছে।
চিপিআই(এম)য়ে কয় যে ৰাজনৈতিক দলসমূহে ধৰ্ম-আধাৰিত ৰাজনীতিত লিপ্ত হোৱা উচিত নহয়।
য়েচুৰীয়ে জ্যোতি বসুৰ ১৫সংখ্যক মৃত্যু বাৰ্ষিকী উপলক্ষে আয়োজিত এক অনুষ্ঠানত অংশ ল'বলৈ কলকাতাত উপস্থিত আছিল৷ তেওঁ সাংবাদিকক কয় যে প্ৰতিটো দলে সাম্প্ৰদায়িক সম্প্ৰীতি আৰু সংবিধানৰ নীতিৰ সুৰক্ষাৰ বাবে কাম কৰা উচিত।
তৃণমূল কংগ্ৰেছে ঘোষণা কৰিছে যে অযোধ্যাত নিৰ্মাণ হৈ থকা বিশাল ৰাম মন্দিৰত ৰামলালাৰ প্ৰাণ প্ৰতিষ্ঠাৰ দিনা ২২ জানুৱাৰীত বিভিন্ন ধৰ্মৰ নেতাসকলৰ সৈতে এক 'সম্প্ৰীতি সমদল' অনুষ্ঠিত কৰিব।
তৃণমূলৰ কাৰ্যসূচী সন্দৰ্ভত সোধা প্ৰশ্নত য়েচুৰীয়ে কয়, সাম্প্ৰদায়িক সম্প্ৰীতি সুৰক্ষিত কৰাৰ বাবে প্ৰতিটো দলৰ প্ৰচাৰ চলোৱাৰ অধিকাৰ আছে। কিন্তু এনে অভিযানৰ নামত কোনো প্ৰতিযোগিতামূলক সাম্প্ৰদায়িকতা থাকিব নালাগে। কোনো ৰাজনৈতিক মেৰুকৰণ হোৱা উচিত নহয়।
ইয়াৰ পূৰ্বে য়েচুৰীয়ে কেন্দ্ৰৰ প্ৰধানমন্ত্ৰী নৰেন্দ্ৰ মোদী নেতৃত্বাধীন চৰকাৰৰ ওপৰত তীব্ৰ আক্ৰমণ চলাই অভিযোগ কৰি কৈছিল যে বিজেপিয়ে ৰাজনৈতিক বিৰোধীসকলক হাৰাশাস্তি কৰিবলৈ প্ৰৱৰ্তন সঞ্চালকালয় (ইডি) আৰু কেন্দ্ৰীয় অনুসন্ধান ব্যুৰো (চিবিআই)ৰ দৰে কেন্দ্ৰীয় সংস্থাক ব্যৱহাৰ কৰে।
Continue Reading
