ডিজিটেল ডেস্কঃ ভাৰতীয় ক্ৰিকেট আইকন বিৰাট কোহলী সমগ্ৰ বিশ্বতে জনপ্ৰিয়। শেহতীয়াকৈ চুৰাটৰ এজন ব্যৱসায়ীয়ে কোহলীক এক অনন্য ধৰণেৰে প্ৰশংসা কৰাৰ সিদ্ধান্ত গ্ৰহণ কৰিছে। বিৰাট কোহলীক ১.০৪ কেৰেটৰ হীৰাৰে ভৰপূৰ বেট এখন উপহাৰ দিব ব্যৱসায়ীগৰাকীয়ে।
বিৰাট কোহলীৰ বিশ্বৰ কোটি কোটি অনুৰাগীয়ে তেওঁৰ অলপ সান্নিধ্য পাবলৈ ব্যাকুল হৈ থাকে। বিৰাট কোহলিয়ে পৃথিৱীৰ যি ঠাইতে খেলে, তেওঁৰ সমৰ্থক সকলোতে দেখা পোৱা যায়। বিৰাট কোহলীয়ে এতিয়া এছিয়া কাপত ভাৰতৰ হৈ বেটখনেৰে চমক সৃষ্টি কৰিবলৈ সাজু হৈছে।
২ ছেপ্টেম্বৰত পাকিস্তানৰ বিৰুদ্ধে খেলপথাৰত নামিব বিৰাট কোহলি, যাৰ বাবে অনুৰাগীসকলে আগ্ৰহেৰে অপেক্ষা কৰি আছে।
বিৰাট কোহলীৰ এজন অনুৰাগীয়ে ৰজা কোহলীক হীৰা বেট উপহাৰ দিবলৈ সাজু হৈছে। চুৰাটৰ ব্যৱসায়ী, হীৰা প্ৰযুক্তি বিশেষজ্ঞ তথা লেক্সাছ চফ্টমেক কোম্পানীৰ সঞ্চালক উৎপল মিষ্ট্ৰীয়ে কোহলীক হীৰা বেট উপহাৰ দিয়াৰ কথা ঘোষণা কৰিছে। বিশ্বকাপ আৰম্ভ হোৱাৰ পূৰ্বে তেওঁ এই বেটখন বিৰাটক উপহাৰ দিব।
২০২৩ চনৰ বিশ্বকাপৰ পূৰ্বে বিৰাট কোহলীৰ দিবলগীয়া এই বেটৰ মূল্য হ’ব ১০ লাখ টকা। এক সাক্ষাৎকাৰত উৎপল মিষ্ট্ৰীয়ে কয় যে কোহলীৰ বাবে হীৰাৰে নিৰ্মিত বেট প্ৰস্তুত কৰা হৈছে। ১.০৪ কেৰেট হীৰাৰে নিৰ্মিত এই বেটটো ১১ মিলিমিটাৰ দীঘল আৰু ৫ মিলিমিটাৰ বহল। বনাবলৈ প্ৰায় এমাহ সময় লাগিল।
বিশ্বকাপত ভাৰতৰ বাবে অতি গুৰুত্বপূৰ্ণ খেলুৱৈ হিচাপে বিবেচিত হৈছে বিৰাট কোহলী। এনে পৰিস্থিতিত দলটোৱে তেওঁৰ বেটৰ পৰা বিশাল ৰান বাহিৰ হোৱাৰ আশা কৰিব। যোৱা বছৰ খেলা টি-২০ বিশ্বকাপত বিৰাট কোহলীয়ে পাকিস্তানৰ বিৰুদ্ধে স্মৰণীয় ইনিংছ খেলি ভাৰতৰ হৈ জয়লাভ কৰিছিল। এইবাৰ ১৪ অক্টোবৰত পাকিস্তানৰ বিৰুদ্ধে এখন মেচ খেলিব ভাৰতে।
Continue Reading
