প্ৰধানমন্ত্ৰী মোদীয়ে পুৱা ৬ বজাৰ পৰাই কৰে ক্ৰিকেটৰ নেট প্ৰেক্টিছ! ক’লে বৈদেশিক মন্ত্ৰী জয়শংকৰে

জয়শংকৰে কয় যে ক'ভিড ৰ প্ৰাদুৰ্ভাৱৰ পিছত ভাৰতে লকডাউন ঘোষণা কৰা, ভেকছিন উৎপাদন বৃদ্ধি কৰা, টিকাকৰণ কাৰ্যসূচী আৰম্ভ কৰা আৰু ভেকছিনৰ প্ৰয়োজন হোৱা দেশসমূহক সহায় কৰাৰ সিদ্ধান্ত লোৱাৰ সময়তো মোদীৰ কঠোৰ সিদ্ধান্ত লোৱাৰ কৌশল বিশ্ববাসীৰ চকুত ধৰা পৰিছিল৷ জয়শংকৰে কয় " কেপ্টেইন মোদীৰ  যথেষ্ট নেট অনুশীলন আছে। নেট অনুশীলন পুৱা ৬ বজাত আৰম্ভ হয় আৰু যথেষ্ট দেৰীলৈকে  চলি থাকে,"৷  প্ৰাক্তন ব্ৰিটিছ প্ৰধানমন্ত্ৰী টনি ব্লেয়াৰ আৰু ইংলেণ্ডৰ প্ৰাক্তন ক্ৰিকেটাৰ কেভিন পিটাৰছনৰ সৈতে হোৱা এক মতবিনিময়ত  জয়শংকৰে  এনেদৰে কয়। বৈদেশিক পৰিক্ৰমা মন্ত্ৰীগৰাকীয়ে  কয় যে কেপ্টেইন মোদীয়ে  তেওঁৰ সহকৰ্মীসকলক কিছুমান  নিৰ্দিষ্ট পৰিস্থিতিৰ সৈতে মোকাবিলা কৰিবলৈ  বিশ্বাসত লৈ আহিছে৷ 

 তেওঁ কয় "যদি আপোনাৰ কোনো নিৰ্দিষ্ট বলাৰ আছে যাৰ ওপৰত আপোনাৰ বিশ্বাস আছে বা আপুনি ভাল প্ৰদৰ্শন কৰা দেখিছে, আপুনি তেওঁলোকক স্বাধীনতা দিয়ক,  আপুনি সঠিক মুহূৰ্তত বলটো তেওঁলোকৰ ওচৰলৈ দলিয়াই দিয়ক। আপুনি তেওঁলোকক সেই নিৰ্দিষ্ট পৰিস্থিতিৰ মোকাবিলা কৰিবলৈ বিশ্বাস কৰক,দেখিব জয় সহজ হৈছে" । কেপ্টেইন মোদীয়ে তেওঁৰ বলাৰসকলক এক নিৰ্দিষ্ট পৰিমাণৰ স্বাধীনতা প্ৰদান কৰিছে বুলিও তেওঁ কয়।  জয়শংকৰে কয় " আমি সকলোৱে যদি যোৱা তিনি বছৰলৈ  ঘূৰি চাওঁ, লকডাউনৰ সিদ্ধান্তটো এটা অতি কঠিন সিদ্ধান্ত আছিল। কিন্তু সেই সময়ত এনে সিদ্ধান্ত লোৱাটো প্ৰয়োজনীয় আছিল৷ " জয়শংকৰে লগতে এই কথাও স্মৰণ কৰে যে কেনেদৰে মোদীয়ে  ব্লেয়াৰৰ সৈতে এষ্ট্ৰজেনেকা/কভিশ্বিল্ড ভেকছিন উৎপাদনৰ বাবে কেঁচা সামগ্ৰীৰ যোগান নিশ্চিত কৰিবলৈ ঘনিষ্ঠভাৱে কাম কৰিছিল।সেইবাবেই কোভিড জয় কৰাত ভাৰত সফল হোৱা বুলি তেওঁ উল্লেখ কৰে৷