মেঘালয়, নাগালেণ্ড আৰু ত্ৰিপুৰাৰ নিৰ্বাচন সৰু ৰাজ্যৰ নিৰ্বাচন! সেই ৰাজ্য কেইখনৰ দলবোৰে কেন্দ্ৰত যি দলেই থাকে তাকেই সমৰ্থন কৰেঃ মল্লিকাৰ্জুন খাৰ্গে

মেঘালয়, নাগালেণ্ড আৰু ত্ৰিপুৰাৰ নিৰ্বাচনী ফলাফল ঘোষণাৰ পিছতে খাৰ্গেই কৰা মন্তব্যই তীব্ৰ প্ৰতিক্ৰিয়াৰো সৃষ্টি কৰা পৰিলক্ষিত হৈছে৷  ত্ৰিপুৰা আৰু নাগালেণ্ডত বিজেপি মিত্ৰজোঁট জয়ী হৈছে, আনহাতে মেঘালয়ৰ একক বৃহত্তম দলটোৱে এতিয়া বিজেপিকে  সমৰ্থন কৰাৰ দিশে৷ তিনিও খন ৰাজ্যতে কংগ্ৰেছৰ প্ৰদৰ্শন আকৌ এবাৰ হতাশাজনক হৈছে। অৱশ্যে ইয়াৰ মাজতে  কংগ্ৰেছৰ সভাপতি মল্লিকাৰ্জুন খাৰ্গেই উত্তৰ-পূবৰ ৰাজ্য  কেইখনৰ  নিৰ্বাচনবোৰক গুৰুত্বপূৰ্ণ বুলি বিবেচনা কৰা নাই। খাৰ্গেই কয় "এয়া সৰু ৰাজ্যসমূহৰ নিৰ্বাচন। সাধাৰণতে, উত্তৰ-পূবৰ দলবোৰে কেন্দ্ৰত চৰকাৰ থকা দলৰ  সৈতেই যায়,"৷ খাৰ্গেৰ এনে মন্তব্যৰ পিছতে ছ’চিয়েল মিডিয়াত নেটিজেনৰ বহুতে কংগ্ৰেছ সভাপতিগৰাকীক উভতি ধৰিছে৷ বহুতে এইবুলি প্ৰশ্ন কৰিছে যে ডাঙৰ ৰাজ্য সমূহত কংগ্ৰেছৰ শনিৰ দশা চলিছে কিয়? 

দৰাচলতে ব্যৰ্থতা ঢাকিবলৈয়েই কংগ্ৰেছৰ সভাপতি মল্লিকাৰ্জুন খাৰ্গেই মেঘালয়, নাগালেণ্ড আৰু ত্ৰিপুৰাৰ নিৰ্বাচনক সৰু ৰাজ্যৰ নিৰ্বাচন বুলি কোৱা বুলি বহুতে আলোচনা কৰিছে৷  উল্লেখ্য এইবেলি ত্ৰিপুৰা বিধানসভাত বিজেপিয়ে ৩২খন আসন লাভ কৰিছে। চিপিএমে এ ১০খন আসন, কংগ্ৰেছে তিনিখন আৰু তিপ্ৰাম’থাই লাভ কৰিছে ১৩খন আসন৷নাগালেণ্ডত বিজেপি মিত্ৰজোঁটে লাভ কৰিছে   ৩৮খনে আসন৷ নাগালেণ্ডত এনডিপিপি–এ ২৬খন আৰু বিজেপিয়ে লাভ কৰে ১২খন আসন । ৬০খন আসনযুক্ত নাগালেণ্ড বিধানসভা নিৰ্বাচনৰ ফলাফলত এনপিএফ দলে লাভ কৰে দুখন আসন, এনপিপি দলে চাৰিখন আৰু অন্যান্যই লাভ কৰে ১৬খন আসন।মেঘালয়ত এনপিপি দলে লাভ কৰিছে ২৭খন আসন। বিজেপিয়ে দুখন আসন লাভ কৰাৰ লগতে কংগ্ৰেছে ৫ খন, তৃণমূল কংগ্ৰেছে ৫ খন আৰু অন্যান্যই লাভ কৰিছে ২০খন আসন।