ডিজিটেল ডেস্কঃ দিল্লী বিশ্ববিদ্যালয়ৰ স্কুল অৱ অ’পেন লাৰ্নিঙৰ পৰা স্নাতক ডিগ্ৰী লাভ কৰা এজন ১৯ বছৰীয়া ছাত্ৰক দেওবাৰে ছুৰীৰে আঘাত কৰি হত্যা কৰা হয়। এই ছাত্ৰজনক আৰ্য্যভট্ট মহাবিদ্যালয়ত ক্লাছলৈ যোৱাৰ সময়ত তিনিজন যুৱকে আক্ৰমণ কৰিছিল। ছাত্ৰগৰাকীৰ নাম নিখিল চৌহান বুলি জানিব পৰা গৈছে। তেওঁ পাছিম বিহাৰৰ বাসিন্দা। এই সন্দৰ্ভত তথ্য দিলে এজন আৰক্ষী বিষয়াই।
ঘটনা সন্দৰ্ভত চৰক পালিকা চিকিৎসালয়ৰ পৰা ফোন অহা বুলি এজন আৰক্ষী বিষয়াই জনায়। গুৰুতৰভাৱে আহত ছাত্ৰজনক বুকুত ছুৰীৰে আঘাত কৰি চিকিৎসালয়লৈ অনা হৈছে বুলি ফোন কৰা লোকজনে আৰক্ষীক অৱগত কৰে। চিকিৎসকে যুৱকজনক মৃত ঘোষণা কৰিছিল। আৰক্ষীয়ে জনোৱা মতে, চিকিৎসালয়খনৰ পৰা তথ্য লাভ কৰাৰ লগে লগে এটা দল প্ৰেৰণ কৰা হয়। তালৈ যোৱাৰ লগে লগে দেখা গ’ল যে পাছিম বিহাৰৰ বাসিন্দা নিখিল চৌহানক ভৰ্তি কৰা হৈছে। আৰ্যভট্ট মহাবিদ্যালয়ৰ পৰা অনা হৈছিল ছাত্ৰজনক। সোধা-পোছাত আৰক্ষীয়ে জানিব পাৰিলে যে নিখিল স্কুল অৱ অ’পেন লাৰ্নিং (এছ অ’ এল)ৰ প্ৰথম বৰ্ষৰ বি এ (অনাৰ্ছ) ৰাজনীতি বিজ্ঞানৰ ছাত্ৰ।
আৰক্ষীয়ে জনোৱা মতে, প্ৰায় সাত দিন পূৰ্বে এছ অ’ এলৰ এগৰাকী ছাত্ৰই কলেজত নিখিলৰ প্ৰেমিকাৰ সৈতে অসৎ আচৰণ কৰিছিল। বিষয়াগৰাকীয়ে জনোৱা মতে, দেওবাৰে নিশা প্ৰায় ১২.৩০ বজাত নিখিলৰ প্ৰেমিকাৰ সৈতে অসৎ আচৰণ কৰা একেজন ছাত্ৰই কলেজৰ গেটৰ বাহিৰত তেওঁৰ তিনিজন সংগীৰ সৈতে নিখিলক লগ পায়। ইয়াৰ পিছত নিখিলৰ বুকুত ছুৰীৰে আঘাত কৰে। ঘটনা সন্দৰ্ভত আৰক্ষীয়ে হত্যাৰ গোচৰ ৰুজু কৰি বিষয়টোৰ তদন্ত অব্যাহত ৰাখিছে। বৰ্তমান কোনো অভিযুক্তক গ্ৰেপ্তাৰ কৰা হোৱা নাই। নিখিলৰ মৃত্যুত স্তম্ভিত হৈ পৰিছে পৰিয়ালটো। এই পৰ্যন্ত আৰ্যভট্ট মহাবিদ্যালয় প্ৰশাসনৰ কোনো বিবৃতি ওলোৱা নাই।
Continue Reading
