ডিজিটেল ডেস্কঃ যেন প্লে’ অফৰ বাবে নেট প্ৰেক্টিছহে কৰিলে চেন্নাই চুপাৰ কিংছে! দিল্লী কেপিটেলছৰ বিৰুদ্ধে দূৰ্দান্ত বিজয়সাব্যস্ত কৰিলে ধোনী বাহিনীয়ে। অৰুণ জেটলী ষ্টেডিয়ামত খেলা মেচখনত আয়োজক দলটো পৰাস্ত হয় ৭৮ ৰাণত।
প্ৰথমে বেটিং কৰি চেন্নাইয়ে তিনিটা উইকেট হেৰুৱাই সংগ্ৰহ কৰে পৰ্বতসম ২২৩ ৰান। দলটোৰ এই দূৰ্দান্ত স্থিতিৰ মূলতে আছিল অপেনাৰদ্বয় ডেভন কনৱে’ আৰু ৰুতুৰাজ গাইকোৱাৰডৰ মাৰমুখী বিশাল ইনিংছ। ৰুতুৰাজে ৫০ টা বলত ৭৯ ৰান আৰু কনৱে’ই ৫২ টা বলত ৮৭ ৰান কৰে। অপেনিং পাৰ্টনাৰশ্বিপত দুয়ো ১১৪ ৰানক যুটী গঢ়ে। শিৱম ডুবেই ৯ টা বলত ২২ আৰু ৰবীন্দ্ৰ জাডেজাই ৭ টা বলত ২০ ৰান কৰে।
প্ৰত্যুত্তৰত ২২৪ ৰানৰ লক্ষ্য লৈ দিল্লীয়ে আৰম্ভণিৰে পৰাই উজুটি খাব ধৰে। অধিনায়ক ডেভিড ৱাৰ্ণাৰৰ বাদে আন কোনোৱে বিশাল ইনিংছ খেলিব নোৱাৰিলে। ৱাৰ্ণাৰে ৫৮ টা বলত ৮৬ ৰান সংগ্ৰহ কৰে। ১৪৬ ৰানতে শেষ হয় দিল্লীৰ ইনিংছ। বেটিঙৰ সমান্তৰালকৈ চেন্নাইৰ বলিং বাহিনীয়েও দূৰ্দান্ত প্ৰদৰ্শন কৰে। দীপক চাহাৰে ৩টাকৈ উইকেট লাভ কৰে। আনহাতে, দুটাকৈ উইকেট লাভ কৰে মথীছা পথিৰানা আৰু মহীষ থিকচানাই।
এই বিজয়েৰে প্লে অফৰ বাবে স্থান নিশ্চিন্ত কৰিছে চেন্নাইয়ে।
Continue Reading
