ডিজিটেল ডেস্ক: পাগুৰি মাৰিলেই খালিস্তানী হৈ পৰিব নেকি পঞ্জাবী সম্প্ৰদায়ৰ লোক? দেশজুৰি এতিয়া এই প্ৰশ্ন উত্থাপন হৈছে৷ বিদেশৰ ভূমিত বহুবাৰ পাগুৰি পৰিধান কৰা সাধাৰণ পঞ্জাবী সম্প্ৰদায়ৰ লোক তিৰস্কাৰৰ সন্মুখীন হৈ অহাৰ ঘটনা বহুবাৰ সংঘটিত হৈছে৷
আমেৰিকা, কানাডা, ইংলেণ্ডত প্ৰায়েই এনে ঘটনা সংঘটিত হৈ আহিছে যদিও এইবাৰ দেশৰ ভূমিতেই এনে তিৰস্কাৰৰ সন্মুখীন হ’ল পঞ্জাবী সম্প্ৰদায়ৰ ব্যক্তি৷ শেহতীয়াকৈ পশ্চিমবংগত এগৰাকী IPS বিষয়াক খালিস্তানী বুলি অভিহিত কৰাৰ পাছতেই এতিয়া সমগ্ৰ দেশতে সৃষ্টি হৈছে প্ৰতিক্ৰিয়াৰ৷
দৰাচলতে পশ্চিমবংগৰ উত্তৰ ২৪ পৰগনা জিলাত সংঘটিত হৈছিল এই অবাঞ্চিত ঘটনা৷ পশ্চিমবংগৰ বিজেপি নেতা সুভেন্দু অধিকাৰীয়ে জিলাখনৰ সন্দেশখালী অঞ্চল ভ্ৰমণৰ সময়ত বাধা প্ৰদান কৰিছিল আৰক্ষীয়ে৷ যাৰ পাছতেই সেই স্থানত সৃষ্টি হৈছিল অপ্ৰীতিকৰ পৰিস্থিতিৰ৷ আৰক্ষীৰে বাকযুদ্ধত লিপ্ত হৈছিল একাংশ বিজেপি কৰ্মী৷ তাৰমাজতেই কোনো বিজেপি সমৰ্থকে IPS বিষয়া যশপ্ৰীত সিঙক খালিস্তানী বুলি অভিহিত কৰাৰ উঠিছে গুৰুতৰ অভিযোগ৷
এই ঘটনাৰ পাছতে সমগ্ৰ দেশজুৰি সৃষ্টি হৈছে তীব্ৰ প্ৰতিক্ৰিয়াৰ৷ পশ্চিমবংগৰ শিখ সম্প্ৰদায়ৰ লোকে প্ৰতিবাদ সাব্যস্ত কৰিছে ৰাজ্যখনৰ বিজেপি মুখ্য কাৰ্যালয়ৰ বাহিৰত৷ ইপিনে ঘটনাক লৈ প্ৰতিক্ৰিয়া প্ৰকাশ কৰিছে কংগ্ৰেছ নেতা ৰাহুল গান্ধীয়েও৷ বিজেপিক তীব্ৰ সমালোচনা কৰি সমগ্ৰ দেশ IPS যশপ্ৰীত সিঙৰ সৈতে আছে বুলি সামাজিক মাধ্যমযোগে জনালে কংগ্ৰেছ নেতাগৰাকীয়ে৷
ইপিনে পঞ্জাব বিধানসভাৰ বিৰোধী নেতাই ঘটনাক লজ্জাজনক আখ্যা দি সামাজিক মাধ্যমত শ্বেয়াৰ কৰিছে এটা ভিডিঅ’৷ ঘটনাৰে জড়িতসকলক কঠোৰ শাস্তিৰ দাবী কৰিছে পঞ্জাব বিধানসভাৰ বিৰোধী নেতাগৰাকীয়ে৷ বিৰোধী দল কংগ্ৰেছেও নিজৰ X হেণ্ডেলত ঘটনাৰ ভিডিঅ’ শ্বেয়াৰ কৰি এয়া নিকৃষ্ট মানসিকতাৰ পৰিচায়ক বুলি অভিহিত কৰিছে৷ ইতিমধ্যে বহুকেইগৰাকী বিৰোধী নেতাই ঘটনাক লৈ প্ৰকাশ কৰিছে তীব্ৰ প্ৰতিক্ৰিয়া৷
Continue Reading
