ডিজিটেল ডেস্ক: ৰাছিয়াৰ ৰাষ্ট্ৰপতি ভ্লাদিমিৰ পুটিনে পশ্চিমীয়া দেশসমূহৰ প্ৰতি প্ৰদান কৰিছে সতৰ্কবাণী৷ ২৫ ছেপ্টেম্বৰত মস্কোৰ ক্ৰেমলিনত অনুষ্ঠিত এক সুৰক্ষা পৰিষদৰ বৈঠকত ঘোষণা কৰিছে ৰাছিয়াৰ ৰাষ্ট্ৰপতি ভ্লাদিমিৰ পুটিনে নতুন নিউক্লিয়াৰ নীতি। এই নীতি সম্পৰ্কে উল্লেখ কয় যে, ‘কোনো পাৰমাণৱিক শক্তিৰ সমৰ্থিত পাৰমাণৱিক শক্তি নথকা ৰাষ্ট্ৰৰ দ্বাৰা ৰাছিয়াৰ ওপৰত যিকোনো আক্ৰমণক ৰাছিয়াৰ ওপৰত যৌথ আক্ৰমণ হিচাপে গণ্য কৰা হ’ব।’
ৰাছিয়াৰ ৰাষ্ট্ৰপতি পুনৰ উল্লেখ কৰে যে, ‘যদি কোনো আক্ৰমণে ৰাছিয়াৰ সাৰ্বভৌমত্বক সংকটত পেলায় তেতিয়া ৰাছিয়াই নিউক্লিয়াৰ ক্ষেপনাস্ত্ৰ ব্যৱহাৰ কৰিব পাৰে৷’ এই নতুন আনৱিক নীতি অনুসৰি পশ্চিমৰ দেশসমূহক সতৰ্ক কৰি দিছে, ইউক্ৰেইনক দীঘলীয়া সময় ধৰি অস্ত্ৰ যোগান ধৰাৰ ফলত ৰাছিয়া আৰু নেটো গোষ্ঠীৰ মাজত যুদ্ধৰ পৰিস্থিতি সৃষ্টি হ’ব।
ইয়াৰ প্ৰত্যুত্তৰত ইউক্ৰেইনৰ ৰাষ্ট্ৰপতি জেলেনস্কিৰ মুখ্য কৰ্মচাৰী এণ্ড্ৰি য়েৰমাকে কয় যে, ‘পাৰমাণৱিক ব্লেকমেইলৰ বাহিৰে ৰাছিয়াৰ হাতত বিশ্বক ভীতিগ্ৰস্ত কৰিব পৰা কোনো আহিলা নাই। এই ভয় দেখুৱাই ৰাছিয়া সফল নহ’ব।’ জেলেনস্কিয়েও আমেৰিকাৰ পৰা আনৱিক শক্তিৰ অনুমোদন বিচৰাৰ ইচ্ছা প্ৰকাশ কৰিছে যাতে ইউৰোপীয় মিত্ৰ দেশসমূহে ৰাছিয়াৰ ভূখণ্ডৰ গভীৰতাত আক্ৰমণ কৰিবলৈ দীৰ্ঘ দূৰত্বৰ অস্ত্ৰ ব্যৱহাৰ কৰিব পাৰে। অৱশ্যে বাইডেন প্ৰশাসনে স্পষ্ট কৰি দিছে যে ৰাছিয়াৰ ভিতৰত কিয়ভৰ আমেৰিকাৰ অস্ত্ৰ-শস্ত্ৰ ব্যৱহাৰ অনুমতি নাই।
উল্লেখযোগ্য যে ভ্লাদিমিৰ পুটিনৰ নতুন নিউক্লিয়াৰ নীতিয়ে ৰাছিয়াৰ সামৰিক কৌশলত এক গুৰুত্বপূর্ণ পৰিৱৰ্তন সূচনা কৰিছে,ই বিশ্ব সুৰক্ষাৰ ওপৰত সুদূৰপ্ৰসাৰী প্ৰভাৱ পেলাব। ৰাছিয়া পশ্চিমৰ দেশসমূহক সতৰ্ক কৰি দিব বিছাৰিছে যে, ইউক্ৰেইনক সমৰ্থন কৰাৰ ফলত কি বিপদ হ’ব পাৰে।
Continue Reading
