ডিজিটেল ডেস্কঃ তীব্ৰ বিত্তীয় সংকটৰ মাজতে আকৌ এবাৰ ৰাজনৈতিক অস্থিৰতাৰ সন্মুখীন হোৱা শ্ৰীলংকাত মূল্যবৃদ্ধিয়ে অতি ভয়াৱহ ৰূপ ধাৰণ কৰিছে। ইন্ধনৰ অত্যধিক মূল্যবৃদ্ধিয়ে হাৰাশাস্তি কৰা শ্ৰীলংকাবাসীয়ে এতিয়া এসাঁজ আহাৰ যোগাৰ কৰাৰ বাবে ত্ৰাহিমধুসূদন সুঁৱৰিছে। বিশেষকৈ শ্ৰীলংকাত খাদ্যসামগ্ৰীৰ তীব্ৰ অভাৱ ঘটিছে। দেশখনৰ বজাৰত শাক-পাচলিৰ যোগান ইমানে হ্ৰাস পাইছে যে প্ৰতি কিলো বিলাহী এহেজাৰ টকা, প্ৰতি কিলো আলু ৮০০ টকাত বিক্ৰী হৈ আছে।
ৰন্ধন গেছৰ নাটনি আৰু বিজুলী যোগান বন্ধ থকাৰ ফলত সৰহ সংখ্যক লোকে এতিয়া খাদ্য প্ৰস্তুত কৰা বাবে খৰিৰ চৌকা ব্যৱহাৰ কৰিব লগা হৈছে। দেউলীয়া হৈ পৰিল মহাকাব্য ৰামায়ণত বৰ্ণিত 'স্বৰ্ণনগৰী লংকা'। খাদ্য-ইন্ধন ক্ৰয় কৰিবলৈ সামৰ্থ হেৰুৱাইছে শ্ৰীলংকাই। ঋণত পোত যোৱা শ্ৰীলংকাৰ অৰ্থনীতিয়ে বিশ্ববাসীক চিন্তাত পেলাইছে। সৰ্বসাধাৰণৰ প্ৰতিবাদত কঁপিছে এতিয়া শ্ৰীলংকা। খাদ্য সংকটত পৰিছে সৰ্বসাধাৰণ। গতিকে চৰকাৰৰ বিৰুদ্ধে দেশখনত তীব্ৰতৰ হৈছে প্ৰতিবাদ। প্ৰতিবাদে লৈছে হিংসাত্মক ৰূপ। এখন দেশৰ এনে সংকট নিশ্চয় অতি ভয়ংকৰ।
প্ৰতিবাদকাৰীসকলে ৰাষ্ট্ৰপতিৰ লগতে প্ৰধানমন্ত্ৰীৰ পদত্যাগ দাবী কৰি সাব্যস্ত কৰা এনে প্ৰতিবাদে ভয়ংকৰ ৰূপ ধাৰণ কৰিছে। প্ৰতিবাদকাৰীৰ ৰুদ্ৰৰূপ দেখি প্ৰাণৰ মমতাত ৰাষ্ট্ৰপতি গোটাবায়া ৰাজপাক্ষেয়ে দেশ এৰি পলায়ন কৰিছে। উল্লেখ্য যে এখন দেশৰ আভ্যন্তৰীণ পৰিৱেশ যেতিয়া অস্থিৰ হৈ পৰে অথবা জৰুৰীকালীন অৱস্থাৰ সৃষ্টি হয় তেতিয়া তাৰ প্ৰভাৱ ইয়াৰ চুবুৰীয়া দেশ সমূহৰ ওপৰতো পৰে। বিভিন্ন বিশ্ব প্ৰতিষ্ঠান তথা দেশৰ সহযোগত শ্ৰীলংকাৰ অৰ্থনীতি পুনৰ সুস্থিৰ অৱস্থালৈ ঘূৰি আহি দেশখনত শান্তি প্ৰতিষ্ঠা হব বুলি আশা কৰিছে বিশ্ববাসীয়ে।
Continue Reading
