ডিজিটেল ডেস্কঃ চলিত বৰ্ষৰ আৰম্ভণিতে হোৱাটছএপত মেটা এআই প্ৰৱৰ্তন কৰাৰ পিছত ইয়াক অধিক ব্যৱহাৰকাৰী অনুকূল কৰি তোলাৰ দিশত কেইবাটাও প্ৰচেষ্টা হাতত লৈছে। ইতিমধ্যে হোৱাটছএপে ব্যক্তিগত সহায়ক হিচাপে মেটা এআই বিকশিত কৰি এতিয়া হিন্দীতো উপলব্ধ কৰি ব্যৱহাৰকাৰীৰ অভিজ্ঞতা ক্ৰমান্বয়ে ভালৰ দিশলৈ আগবঢ়াই নিছে ।
এক প্ৰতিবেদন অনুসৰি হোৱাটছএপে এটা নতুন বৈশিষ্ট্যৰ কাম চলাই আছে যাৰ নাম হৈছে “Chat Memory”। এই বৈশিষ্ট্যই মেটা এআইক দিয়া গুৰুত্বপূৰ্ণ তথ্য ৰেকৰ্ডিং কৰাত সহায় কৰিব, যাৰ ফলত এই ব্যক্তিগত সহায়কটো আৰু অধিক ব্যৱহাৰকাৰী অনুকূল হ’ব। উদাহৰণস্বৰূপে, যদি এআইয়ে জানে যে আপুনি নিৰামিষভোজী, তেন্তে সেই অনুসৰি আপোনাৰ সৈতে ৰেচিপি শ্বেয়াৰ কৰিব। অৱশ্যে এই বৈশিষ্ট্যৰ সৈতে গোপনীয়তা সম্পৰ্কীয় সমস্যাও আহিব বুলি কোৱা হৈছে। বৰ্তমান এই বৈশিষ্ট্য বিকাশৰ পৰ্যায়ত আছে আৰু ইয়াৰ বিষয়ে সীমিত তথ্যহে উপলব্ধ।
এই বৈশিষ্ট্যই কেনেকৈ কাম কৰিব?
হোৱাটছএপৰ এই নতুন বৈশিষ্ট্য মেটা এআইৰ জৰিয়তে ব্যৱহাৰকাৰীয়ে পূৰ্বে শ্বেয়াৰ কৰা তথ্য মনত ৰাখিব পাৰিব। ইয়াৰ লক্ষ্য হৈছে ব্যৱহাৰকাৰীসকলক তেওঁলোকৰ পছন্দ অনুসৰি অধিক প্ৰাসংগিক আৰু ব্যক্তিগতকৃত সঁহাৰি দিয়া।হোৱাটছএপৰ নতুন ফিচাৰত ব্যৱহাৰকাৰীয়ে কি তথ্য মনত ৰাখিব বিচাৰে সেইটো নিৰ্বাচন কৰাৰ অধিকাৰ দিয়া হ’ব। অৱশ্যে এই সকলোবোৰ স্পষ্ট হ’ব যেতিয়া এই বৈশিষ্ট্য আনুষ্ঠানিকভাৱে মুকলি কৰা হ’ব।
Continue Reading
