পত্নীৰ সৈতে লাগিছিল কাজিয়া, খঙৰ ভমকত স্বামীয়ে জ্বলাই দিলে দহটা ঘৰ…

ডিজিটেল ডেস্কঃ সংসাৰ মানেই একপ্ৰকাৰ এৰা-ধৰা, বুজা-বুজিৰ চুক্তি। স্বামী-স্ত্ৰীৰ মাজত সৰু-সুৰা খুটুং-খাটাং হোৱাটো কোনো অস্বাভাৱিক কথা নহয়। স্বামী-স্ত্ৰীৰ মাজত সৃষ্টি হোৱা কাজিয়াই চূড়ান্ত ৰূপ লোৱাত সংঘটিত হৈছে এক ভয়ংকৰ ঘটনা।

মহাৰাষ্ট্ৰৰ ছটাৰা জিলাত পত্নীৰে কাজিয়া লাগি খৰ্গহস্ত হৈ স্বামীয়ে নিজৰ ঘৰত অগ্নিসংযোগ কৰাত ইয়াৰ দাঁতিকাষৰীয়া ১০টাকৈ ঘৰ জুইত জাহ যায়। তথ্য অনুসৰি সংঘটিত হোৱা অগ্নিকাণ্ডত বহু পৰিমাণৰ সা-সম্পত্তি ধ্বংস হয় আৰু লোকজনক আৰক্ষীয়ে গ্ৰেপ্তাৰ কৰে।

ছটাৰা জিলাৰ মাজগাঁৱৰ সঞ্জয় পাটিল আৰু তেওঁৰ পত্নী পল্লৱীৰ লগত কাজিয়াৰ সূত্ৰপাত হৈ সঞ্জয়ে নিজগৃহত অগ্নিসংযোগ কৰে। জুয়ে ছানি ধৰা ঘৰটোৰ ভিতৰত থকা ৰন্ধন গেছৰ চিলিণ্ডাৰ বিস্ফোৰণ হয় আৰু ওচৰ-চুবুৰীয়া প্ৰায় ১০টা ঘৰলৈ জুই বিয়পি যায়। লগে লগে চাৰিওফালে সৃষ্টি হয় এক হুৱা-দুৱা পৰিৱেশৰ। গাঁওবাসীয়ে জুই নুমুৱাবলৈ জৎপৰোনাস্তি চেষ্টা চলায় যদিও ইতিমধ্যে জুয়ে সকলো গ্ৰাস কৰি পেলায়। সঞ্জয়ক জুইৰপৰা বচোৱা হয় যদিও উত্তেজিত গাঁওবাসীয়ে উত্তম-মধ্যম সোধায়।