পুনৰ তেজেৰে ৰাঙলী ৰাজপথ; তীব্ৰবেগী ট্ৰাকে মহতীয়াই নিলে তিনি মহিলাক

ডিজিটেল ডেস্ক : পুনৰ মৃত্যুৱে কিৰিলি পাৰি হাঁহিলে ৰাজপথত। পুনৰ পথৰ ওপৰত বিভীষিকা সৃষ্টি কৰিলে তীব্ৰবেগী অনিয়ন্ত্ৰিত গতিবেগৰ গাড়ীয়ে। এইবাৰ এই ঘটনাত নিহত হ’ল তিনিজন। ডিভাইডাৰৰ ওপৰত উঠি যোৱা এখন তীব্ৰবেগী ট্ৰাকে মহতীয়াই নিলে তিনিগৰাকী মহিলাক।

এই ঘটনা সংঘটিত হৈছে দিল্লী-হাৰিয়ানা সীমান্ত অঞ্চলত। কৃষকৰ প্ৰতিবাদস্থলীৰ সমীপতে এই ভয়ংকৰ দুৰ্ঘটনা সংঘটিত হয়। জানিব পৰা মতে, মহিলা তিনিগৰাকী পথৰ ডিভাইডাৰ বহি ৰিক্সাৰ বাবে অপেক্ষা কৰি আছিল। সেই সময়তে তীব্ৰবেগী ট্ৰাকখনে তেওঁলোকক মহতীয়াই নিয়ে। দুৰ্ঘটনা সংঘটিত কৰিয়েই পলায়ন কৰে ট্ৰাকৰ ড্ৰাইভাৰজনে। দুৰ্ঘটনাটো ইমানেই ভয়ংকৰ আছিল যে, দুগৰাকী মহিলাৰ থিতাতে মৃত্যু হয় আৰু এগৰাকীৰ মৃত্যু হয় হাস্পতালত।

আৰক্ষীৰ প্ৰাথমিক তদন্তত প্ৰকাশ পোৱা মতে মহিলা তিনিগৰাকী আছিল পঞ্জাৱৰ মানছা জিলাৰ। টিক্ৰী সীমান্তৰ সমীপত এই দুৰ্ঘটনা সংঘটিত হৈছে। আৰক্ষীয়ে ইতিমধ্যে পলাতক ট্ৰাক ড্ৰাইভাৰজনৰ সন্ধানত অনুসন্ধান আৰম্ভ কৰিছে।