ডিজিটেল ডেস্ক: পুত্ৰৰ সফলতাতেই জীৱনৰ সাৰ্থকতা বিচাৰি লয় পিতৃয়ে৷ পৰিশ্ৰম, অধ্যৱসায় আৰু সাধনাৰে সফলতাৰ মণি-মুকুতা বোটলা পুত্ৰৰ সফলতাত গৰ্বিত নহৈ পাৰেনে পিতৃ! বিগ বি অমিতাভ ব্যতিক্ৰম হ’ব কিদৰে? গৌৰৱান্বিত পিতৃ তথা মেগাষ্টাৰ অমিতাভ বচ্চনে তেওঁৰ অভিনেতাপুত্ৰ অভিষেকৰ বাবে লিখিছে এটা আৱেগভৰা পোষ্ট৷
অভিষেকৰ শেহতীয়া চিনেমা ‘ঘুমৰ’এ আঁজুৰিছে কেইবাটাও সন্মান৷ আৰু পুত্ৰৰ চিনেমাৰ সফলতাৰ বাবে বিগ বিয়ে ইনষ্টাগ্ৰামত ‘ঘুমৰ’ৰ পোষ্টাৰ শ্বেয়াৰ কৰি লিখিছে— মোৰ প্ৰাৰ্থনা, মোৰ প্ৰশংসা আৰু মোৰ ভালপোৱা তোমাৰ বাবেই অভিষেক। তুমি মোক বহুত গৌৰৱান্বিত কৰিছা...৷
ইনষ্টাগ্ৰামত অমিতাভে কৰা এই পোষ্টটোৰ কমেণ্ট চেকশ্যনত অভিষেকে নমস্কাৰ আৰু হাঁহি থকা ইমোজী এটা ব্যৱহাৰ কৰিছিল। এজন ব্যৱহাৰকাৰীয়ে লিখিছিল, এইখন এখন অসাধাৰণ চিনেমা, চাব লাগিব।
আৰ বাল্কিৰ দ্বাৰা পৰিচালিত এই চিনেমাখনত অভিষেক, চৈয়ামী খেৰ, অংগদ বেদী আৰু চাবানা আজমীয়ে মুখ্য চৰিত্ৰত অভিনয় কৰিছিল আৰু ১৮ আগষ্টত মুক্তি লাভ কৰিছিল৷
চিনেমাখনত অভিষেকে এজন প্ৰশিক্ষকৰ চৰিত্ৰ ৰূপায়ণ কৰিছে, যাৰ জীৱনে কাহিনীটোত এক অপ্ৰত্যাশিত ৰূপ লয়৷ এগৰাকী পক্ষাঘাতগ্ৰস্ত খেলুৱৈৰ ঘাত-প্ৰতিঘাত আৰু সংগ্ৰামী গাথাৰে আগবাঢ়ে চিনেমাখনৰ কাহিনী৷
Continue Reading
