চৰকাৰী বিদ্যালয়ৰ ছাদ খহি ৪ শিক্ষাৰ্থীৰ কৰুণ মৃত্যু; ১০ শিশু আহত, ৪০ আৱদ্ধ

ডিজিটেল ডেস্কঃ  ৰাজস্থানৰ ঝালাৱাৰত সংঘটিত হৈছে এক কৰুণ ঘটনা। এখন চৰকাৰী বিদ্যালয়ৰ ছাদ খহি ৪ গৰাকী ছাত্ৰ-ছাত্ৰীৰ মৃত্যু হোৱাৰ লগতে ১০জন শিক্ষাৰ্থী গুৰুতৰভাৱে আহত হৈছে।  প্ৰায় ৪০টি শিশু এতিয়াও আৱদ্ধ হৈ আছে।জানিব পৰা অনুসৰি শ্ৰেণীটোৰ ভিতৰত প্ৰায় ৬০টা শিশু উপস্থিত আছিল।

এই দুৰ্ঘটনাটোৰ পিছত অঞ্চলটোৰ ৰাইজে সহায়ৰ বাবে হাত আগবঢ়ায়। ৰাজ্যখনৰ প্ৰাক্তন মুখ্যমন্ত্ৰী অশোক গেহলটে কয় যে, "ঝালাৱাৰৰ মনোহৰ থানাত চৰকাৰী বিদ্যালয় ভৱন ভাঙি পৰাৰ ফলত বহু শিশু আৰু শিক্ষক আহত হোৱাৰ খবৰ পোৱা গৈছে। প্ৰাণ হেৰুৱা সকলৰ আত্মাৰ শান্তিৰ কাৰণে প্ৰাৰ্থনা কৰাৰ লগতে আহতসকলে সোনকালে আৰোগ্য লাভ কৰিবলৈ ভগৱানৰ ওচৰত প্ৰাৰ্থনা জনাইছো।"

ঘটনা সন্দৰ্ভত প্ৰতিক্ৰিয়া প্ৰকাশ কৰি ৰাজস্থান চৰকাৰৰ শিক্ষামন্ত্ৰী মদন দিৱালাৰে কয়, "ঝালাৱাৰৰ এখন বিদ্যালয়ত এক মৰ্মান্তিক ঘটনা সংঘটিত হৈছে। এয়া দুখৰ বিষয়। শিশুসকলক চিকিৎসালয়ত চিকিৎসা প্ৰদান কৰা হৈছে। চৰকাৰী খৰচত শিশুসকলৰ চিকিৎসা কৰা হ'ব। ছাদখন কেনেকৈ ভাঙি গ'ল সেই বিষয়ে উচ্চ পৰ্যায়ৰ তদন্ত কৰা হ'ব।"