ৰাম মন্দিৰ ন্যাসৰ গুৰুত্বপূৰ্ণ সিদ্ধান্ত: ৰাম মন্দিৰ ন্যাসৰ অন্তৰ্ৱৰ্তী সাধাৰণ সম্পাদকৰ দায়িত্বত কৃষ্ণ মোহন

ডিজিটেল ডেস্ক : অযোধ্যাৰ ৰাম মন্দিৰৰ দান-বৰঙনি চুৰিৰ অভিযোগৰ বাবে পদত্যাগ কৰা ৰাম মন্দিৰ ন্যাসৰ সাধাৰণ সম্পাদক চম্পত ৰায় আৰু সদস্য অনিল মিশ্ৰৰ পদত্যাগ্‌-পত্র সোমবাৰে ন্যাসে গ্ৰহণ কৰে। তদুপৰি শেহতীয়াকৈ ন্যাসৰ সদস্যসকলে সর্বসন্মতভাৱে ন্যাসৰক্ষীৰূপে অন্তর্ভুক্ত কৰা কৃষ্ণ মোহনক অন্তৰ্ৱৰ্তী সাধাৰণ সম্পাদকৰ অতিৰিক্ত দায়িত্ব দিয়া হয়। শ্ৰীৰাম জনমভূমি তীর্থ ক্ষেত্ৰ ন্যাসৰ তিনি ঘণ্টীয়া সভাৰ পাছত কোষাধ্যক্ষ গোবিন্দ গিৰীয়ে সাংবাদিকক এই কথা জনায়। 

ভাৰতীয় বন সেৱাৰ (আই এফ এছ) প্রাক্তন বিষয়া কৃষ্ণ মোহনৰ ঘৰ হৈছে উত্তৰ প্ৰদেশৰ হাৰদঈ জিলাৰ শ্বাহাবাদ বিধানসভা সমষ্টিৰ চন্দ্ৰপুৰ গাঁৱত। অৱসৰ গ্ৰহণৰ পাছত মোহন সামাজিক কামত ব্যস্ত হৈ আছে। ৰাম মন্দিৰৰ দান-বৰঙনি চুৰিৰ বিষয়ত আলোচনা কৰিবলৈ আহ্বান জনোৱা ন্যাসৰ সভাখন ৰাম জনমভূমি মন্দিৰ চৌহদৰ অতিথিশালাত বিয়লি ৩-১৫ বজাত আৰম্ভ হয়। 

ন্যাসৰ ৯জন সদস্যৰ ভিতৰত সভাত ন্যাসৰ অধ্যক্ষ নৃত্য গোপাল দাসকে ধৰি ৭জন সদস্য উপস্থিত আছিল। সূত্র মতে, ৰায় আৰু মিশ্ৰ সভাত উপস্থিত নাছিল। বিয়লি প্রায় ৬-৩০ বজাত সভাৰ অন্ত পৰে। উৎস: দৈনিক জনমভূমি