ডিজিটেল ডেস্কঃ আকৌ আহিছে কোভিড৷ গতিকে সাৱধান হ’বৰ হ’ল৷ কোভিডৰ নতুন উত্থানৰ পৰিপ্ৰেক্ষিততে কেন্দ্ৰীয় স্বাস্থ্য দপ্তৰে দেশৰ কেইবা খনো ৰাজ্যলৈ সতৰ্কবাৰ্তা প্ৰেৰণ কৰিছে৷ কেন্দ্ৰীয় স্বাস্থ্য মন্ত্ৰালয়ৰ তথ্য অনুসৰি দেশত শুক্ৰবাৰে ৭৯৬ গৰাকী লোক কোভিডত আক্ৰান্ত হৈছে৷ ১০৯ দিনৰ পিছত দেশত সক্ৰিয় ৰোগীৰ সংখ্যাই ৫,০০০ ৰ সীমা অতিক্ৰম কৰিছে।
দেশত এতিয়া সক্ৰিয় ৰোগীৰ সংখ্যা ৫,০২৬ গৰাকীলৈ লৈ বৃদ্ধি হৈছে৷ সংক্ৰমণৰ হৰ ০.০১%, আনহাতে মৃত্যুৰ হাৰ ১.১৯% বুলি প্ৰকাশ কৰা হৈছে।
এতিয়ালৈকে দেশত কোভিডত আক্ৰান্ত হোৱা মুঠ লোকৰ সংখ্যা এতিয়া ৪.৪৬ কোটি (৪,৪৬,৯৩,৫০৬)হৈছে। স্বাস্থ্য মন্ত্ৰালয়ৰ সূত্ৰই প্ৰকাশ কৰিছে যে বিগত ২৪ ঘণ্টাত কোভিডত পাঁচজন লোকৰ মৃত্যুৰ ঘটনাৰ সৈতে মুঠ মৃত্যুৰ সংখ্যা ৫,৩০,৭৯৫ লৈ বৃদ্ধি পাইছে।
ৰাষ্ট্ৰীয় পুনৰুদ্ধাৰৰ হাৰ ৯৮.৮০ % ৷ এতিয়ালৈকে দেশত ৪,৪১,৫৭,৬৮৫ গৰাকী লোকে কোভিডৰ পৰা আৰোগ্য লাভ কৰিছে৷
যিহেতু দৈনিক কৰোনা ভাইৰাছৰ সংক্ৰমণৰ ক্ষেত্ৰত বৃদ্ধি লক্ষ্য কৰা হৈছে, সেয়ে স্বাস্থ্য মন্ত্ৰালয়ে সংক্ৰমণৰ অধিক আশংকা থকা ছয়খন ৰাজ্য - মহাৰাষ্ট্ৰ, গুজৰাট, তেলেংগানা, তামিলনাডু, কেৰালা আৰু কৰ্ণাটকক সংক্ৰমণ প্ৰতিৰোধ আৰু নিয়ন্ত্ৰণ কৰিবলৈ নিৰ্দেশনা জাৰি কৰিছে৷কেন্দ্ৰীয় স্বাস্থ্য সচিব ৰাজেশ ভূষণে মহাৰাষ্ট্ৰ, গুজৰাট, তেলেংগানা, তামিলনাডু, কেৰালা আৰু কৰ্ণাটকলৈ এই বিষয়ত পত্ৰ লিখিছে৷
Continue Reading
