মুছফিক হুছেইন : নাৰী তুমি অনন্যা৷ নাৰী প্ৰকৃতিৰ অনুপম সৃষ্টি, যাৰ অবিহনে এই পৃথিৱীৰ কোনো অস্তিত্ব নাই বুলিয়েই ক’ব পাৰি৷ সময়ৰ লগে-লগে আমাৰ সমাজ ব্যৱস্থাৰ পৰিৱৰ্তন হ’ল, সলনি হ’ল মানুহৰ নাৰীৰ প্ৰতি থকা নীচ মানসিকতা৷ মুঠৰ ওপৰত বিংশ শতিকাত নাৰীয়েই শিক্ষাৰ পৰা আৰম্ভ কৰি ক্ৰীড়া জগতলৈকে নিজৰ আধিপত্য বিস্তাৰ কৰিবলৈ সক্ষম হৈছে৷
এইবাৰ এগৰাকী নাৰীৰ কান্ধতেই দেশৰ সুৰক্ষাৰ গুৰুত্বপূৰ্ণ ভাৰ অৰ্পণ কৰিছে ভাৰতে৷ অৰুণাচলৰ স্পৰ্শকাতৰ অঞ্চল ভাৰত-চীন সীমান্ত ৰক্ষাৰ দায়িত্বত আছে এগৰাকী সাহসী নাৰী। ৰঙা চীনক সৰ্বোতোপ্ৰকাৰে প্ৰত্যুত্তৰ দিবলৈ তেওঁ সাজু৷ সীমান্তৰ দুৰ্গম অঞ্চলত কামান লৈ সুসজ্জিত হৈ ৰঙা চীনক ৰুধিবলৈ সাজু হৈ আছে তেওঁ৷ বৰ্তমান সীমান্ত ৰক্ষাৰ অতন্দ্ৰ প্ৰহৰী মহিলাগৰাকী৷ তেওঁৰ নাম কেপ্টেইন ছাৰিয়া আব্বাছী৷
ড্ৰ’ন কিলাৰ ৰূপে খ্যাতি লাভ কৰা কেপ্টেইন ছাৰিয়াই অৰুণাচলৰ কোনো অজ্ঞাত স্থানত আগ্ৰাসী চীনক ৰুধিবলৈ খোপনি পুতি আছে৷ বৰ্তমান সামৰিক বাহিনীৰ উন্নীত L-70 Anti Craft Gun ৰ সঞ্চালনৰ দায়িত্বত আছে এইগৰাকী দুৰ্জেয় মহিলা কামাণ্ডাৰ৷ পূৰ্বতে L-70 Anti Craft Gun শত্ৰু হেলিকপ্টাৰ, যুঁজাৰু বিমান ধ্বংস কৰাৰ অভিযানৰ কামত ব্যৱহাৰ কৰা হৈছিল, বৰ্তমান এইখনত ড্ৰ’ন ধ্বংস কৰাৰ ব্যৱস্থা সংযুক্ত কৰা হৈছে৷ এতিয়া সীমান্তত এই ড্ৰ’ন কিলাৰ মৰাণাস্ত্ৰ হাতত লৈ ড্ৰেগন দেশৰ ড্ৰ’ন উৰুৱাবলৈ সাজু হৈ আছে কেপ্টেইন ছাৰিয়া আব্বাছীয়ে৷
বিগত ৪ বছৰে সেনাৰ AIR DEFENCE REGIMENT ত সেৱা আগবঢ়াই আছে এইগৰাকী সাহসী মহিলাই৷ স্পৰ্শকাতৰ টাৱাং চেক্টৰত সেনাৰ AIR DEFENCE REGIMENT ৰ ট্ৰুপ কামাণ্ডাৰ তেওঁ, কেপ্টেইন ছাৰিয়া দেশৰ একমাত্ৰ ইউনিট যাৰ হাতত তুলি দিয়া হৈছে বিমানধ্বংসী আটাইতকৈ শক্তিশালী মৰাণাস্ত্ৰ৷ উল্লেখ্য যে, দেশবাসীৰ দৃষ্টি আৰ্কষণ কৰা কেপ্টেইন ছাৰিয়া আব্বাছী বি. টেক ডিগ্ৰীধাৰী হোৱাৰ লগতে পিতৃ বৰ্তমান আকাশবাণী গোৰখপুৰ কেন্দ্ৰত কৰ্মৰত, মাতৃ হাইস্কুলৰ শিক্ষয়িত্ৰী আৰু ভাতৃ স্মাতক মহলাৰ ছাত্ৰ৷ দেশৰ অগণিত নাৰীৰ বাবে আব্বাছী এতিয়া হৈ উঠিছে প্ৰেৰণাৰ উৎস।
