দক্ষিণ শালমাৰাৰ এখন ঘৰ বজ্ৰপাতত সম্পূৰ্ণৰূপে ভস্মীভূত

ডিজিটেল ডেস্ক: অসম-মেঘালয় সীমান্তৰ সংলগ্ন দক্ষিণ শালমাৰাৰ ৰাজাবালা ভালুক কান্দি গাঁৱত বজ্ৰপাতৰ ফলত ভস্মীভূত হৈছে এক পৰিয়ালৰ আৱাসগৃহ। প্ৰাপ্ত খবৰ অনুসৰি, পুৱতি নিশা হোৱা হঠাৎ প্ৰচণ্ড বৰষুণ আৰু বজ্ৰপাতৰ বাবে গাঁওখনৰ আবু বক্কৰ ছিদ্দিকৰ বাসগৃহটোত জুই লাগি সম্পৰূপে ছাঁই হৈ পৰে।

পৰিয়ালটোৰ সকলো সদস্য সুৰক্ষিত অৱস্থাত বাহিৰলৈ ওলাই আহিবলৈ সক্ষম হোৱাৰ বাবে কোনোধৰণৰ মানুহৰ প্ৰাণহানি হোৱা নাই। ঘৰখনত থকা নগদ ধন, পিন্ধনৰ কাপোৰ-কানি, গৃহস্থালী সামগ্ৰী সম্পূৰ্ণৰূপে জুইত জাহ যায়। ঘৰৰ চৌহদত বান্ধি থোৱা এটা ছাগলী জুইত পৰি অগ্নিদগ্ধ হৈ মৃত্যুমুখত পৰে।

শিক্ষাৰ প্ৰমাণপত্ৰকে ধৰি বহু গুৰুত্বপূৰ্ণ নথিপত্ৰ সম্পূৰ্ণৰূপে জুইত নষ্ট হয়।

এই হঠাৎ হোৱা দুৰ্যোগে আবু বক্কৰ ছিদ্দিকৰ পৰিয়ালটোক মুকলি আকাশৰ তললৈ আনি থিয় কৰাইছে। বৰ্তমান পৰিয়ালটোৰ মাজত গভীৰ আতংক আৰু শোকৰ ছাঁ পৰিছে। স্থানীয় ৰাইজে পৰিয়ালটোক জৰুৰীকালীন সাহায্য প্ৰদান কৰিবলৈ জিলা প্ৰশাসন তথা স্থানীয় প্ৰশাসনিক বিষয়াৰ জৰিয়তে চৰকাৰী সাহায্যৰ দাবী জনাইছে।

স্থানীয় লোকৰ সহযোগত জুই নুমুৱাবলৈ চেষ্টা কৰা হয় যদিও তীব্ৰবেগে জুই বিয়পি পৰাত ঘৰখন সম্পূৰ্ণৰূপে ভস্মীভূত হৈ যায়।