ডিজিটেল ডেস্কঃ সৰ্বোচ্চ ন্যায়ালয়ক অৱমাননা কৰিছে নেকি ষ্টেট বেংক অব্ ইণ্ডিয়াই!মানৱ অধিকাৰ সংগঠন এডিআৰ (এছ’চিয়েশ্যন ফৰ ডেম’ক্ৰেটিক ৰিফৰ্মছ)-এ নিৰ্বাচনী বণ্ডৰ প্ৰকাশ কৰিবলৈ অধিক সময়ৰ বিচৰাৰ বাবে ষ্টেট বেংকৰ অনুৰোধক অৱমাননা হিচাপে মানিবলৈ উচ্চতম ন্যায়ালয়ক প্ৰস্তাৱ দিছে। বিশিষ্ট অধিবক্তা প্ৰশান্ত ভূষণে এডিআৰৰ হৈ মুখ্য ন্যায়াধীশ ডি ৱাই চন্দ্ৰচূড়ৰ বিচাৰপীঠৰ সন্মুখত এই আবেদন দাখিল কৰে।
প্ৰশান্ত ভূষণে কয় যে উচ্চতম ন্যায়ালয়ে বুধবাৰৰ ভিতৰত নিৰ্বাচনী বণ্ডৰ সকলো সবিশেষ তথ্য কৰিবলৈ ষ্টেট বেংকক নিৰ্দেশ দিছিল। তেনে কৰাৰ পৰিৱৰ্তে সোমবাৰে ষ্টেট বেংকে ৩০ জুন অন্তিম তাৰিখ হিচাপে বিচাৰি আবেদন দাখিল কৰিছে৷উচ্চতম ন্যায়ালয়ে এই আবেদনৰ শুনানি ১১ মাৰ্চত গ্ৰহণ কৰিব।
এডিআৰে এক প্ৰতিবেদনত কয় যে ২০২২-২৩ চনত ‘অজ্ঞাত উৎসৰ পৰা আয়’ বুলি ঘোষণা কৰা সৰ্বভাৰতীয় ৰাজনৈতিক দলসমূহৰ মুঠ আয়ৰ ৮২ শতাংশতকৈ অধিক এই নিৰ্বাচনী বণ্ডৰ পৰাই আহিছিল। অজ্ঞাত উৎসৰ পৰা আয় হিচাপে ১৮৩২.৮৮ কোটি টকাৰ ভিতৰত নিৰ্বাচনী বণ্ডৰ পৰা আয়ৰ অংশ আছিল ১৫১০ কোটি টকা, যিটো প্ৰায় ৮২.৪২ শতাংশ। ইয়াৰ পূৰ্বে উচ্চতম ন্যায়ালয়ে বিজেপি চৰকাৰে অনা বণ্ডক অসাংবিধানিক বুলি অভিহিত কৰিছিল।
Continue Reading
