শিক্ষকৰ সমস্যা সমাধানত ব্যৰ্থ মুখ্যমন্ত্ৰী: সংবাদমেলত ছাত্ৰ মুক্তিৰ বিস্ফোৰক অভিযোগ

ডিজিটেল ডেস্ক : আজি গুৱাহাটীৰ গান্ধীবস্তিস্থিত কৃষক মুক্তি সংগ্ৰাম সমিতিৰ কেন্দ্ৰীয় কাৰ্যালয়ত ছাত্ৰ মুক্তি সংগ্ৰাম সমিতিয়ে এখন সংবাদমেল সম্বোধন কৰে৷ কালি সৰ্বশিক্ষা মিছনৰ কাহিলীপাৰাৰ কাৰ্যালয় ঘেৰাও কৰিছিল প্ৰতিবাদী শিক্ষকে৷ ৪০ হাজাৰ টেট শিক্ষকৰ চাকৰি নিয়মীয়াকৰণৰ আন্দোলনৰ প্ৰতি নৈতিক সমৰ্থন আগবঢ়ায় ছাত্ৰ মুক্তি সংগ্ৰাম সমিতিয়ে৷ শিক্ষকৰ সমস্যা সমাধানত মুখ্যমন্ত্ৰী ড° হিমন্ত বিশ্ব শৰ্মা নেতৃত্বাধীন অসম চৰকাৰখন চূড়ান্তভাৱে ব্যৰ্থ হোৱাৰ অভিযোগ উত্থাপন কৰে ছাত্ৰ মুক্তি সংগ্ৰাম সমিতিৰ সাধাৰণ সম্পাদক প্ৰাঞ্জল কলিতাই৷ শিক্ষকৰ সমস্যালৈ পিঠি দি আন্দোলনকাৰী শিক্ষকৰ বিৰুদ্ধে শাস্তিমূলক ব্যৱস্থা গ্ৰহণৰ হুংকাৰ দিয়া অসম চৰকাৰৰ বিৰুদ্ধে সৰব হৈ পৰে ছাত্ৰ মুক্তি সংগ্ৰাম সমিতি৷ ৰাজ্যৰ প্ৰাথমিক বিদ্যালয়ৰ পৰা বিশ্ববিদ্যালয়লৈ খালী হৈ থকা শিক্ষকৰ পদসমূহ অচিৰেই পূৰণ কৰাৰ দাবী উত্থাপন কৰে ছাত্ৰ মুক্তি সংগ্ৰাম সমিতিয়ে৷ সংগঠনটোৰ অভিযোগ, বাজেটত ধার্য ১০০ কোটিৰ এটকাও আজিলৈ লাভ কৰা নাই কটন বিশ্ববিদ্যালয়ে৷ ছাত্ৰ মুক্তিৰ মতে, ২০২২-২৩ বিত্তীয় বৰ্ষৰ বাজেটত অসমৰ শিক্ষা ক্ষেত্ৰক আগুৱাই নিব পৰাকৈ বিশেষ একো নাই৷ তাৰ বিপৰীতে ছাত্ৰীক স্কুটি দিয়াতহে হিমন্ত বিশ্ব শৰ্মা নেতৃত্বাধীন অসম চৰকাৰে গুৰুত্ব দিছে বুলি মন্তব্য সংগঠনটোৰ নেতৃবৰ্গৰ৷ লগতে, শিক্ষকৰ সমস্যা সমাধান নকৰিলে অচিৰেই ছাত্ৰ মুক্তি সংগ্ৰাম সমিতিয়ে আন্দোলনৰ কাৰ্যসূচী ঘোষণা কৰিব বুলি মন্তব্য কৰে৷ সংবাদমেলত ছাত্ৰ মুক্তি সংগ্ৰাম সমিতিৰ আন এগৰাকী সাধাৰণ সম্পাদক ৰাহুল ছেত্ৰী, কাৰ্যকৰী সভাপতি কাশ্যপ নন্দন কলিতা আৰু অন্যান্য বিষয়ববীয়াসকল উপস্থিত থাকে৷