মুজফ্ফৰনগৰত শোকাৱহ ঘটনা! ভয়ংকৰ পথ দুৰ্ঘটনাত জীৱন্তে অগ্নিদগ্ধ হৈ দুই সহোদৰসহ ছয় যুৱকৰ কৰুণ মৃত্যু

ডিজিটেল ডেস্ক: গংগাত পৱিত্ৰ স্নান কৰিবলৈ গৈ আধাবাটতে অকাল মৃত্যুক সাবটিলে ৬জন যুৱকে। এক ভয়ংকৰ পথ দুৰ্ঘটনাত দুই সহোদৰসহ ৬ যুৱকে চিৰদিনলৈ চকু মুদিলে। 

হৰিদ্বাৰলৈ যোৱাৰ পথতে মৃত্যুৰ কোলাত শুই পৰিল ছয় বন্ধু। বাহনত জুই লগাৰ ফলত জীৱন্তে অগ্নিদগ্ধ হৈ মৃত্যু যুৱককেইজনৰ। ধৰ্মীয় বিশ্বাস আৰু ভক্তিৰে পৱিত্ৰ গংগাত স্নান কৰিবলৈ ওলাইছিল ছয়জন যুৱক। কিন্তু হৰিদ্বাৰ পোৱাৰ পূৰ্বেই তেওঁলোকৰ জীৱনযাত্ৰাৰ কৰুণ সমাপ্তি ঘটিল এক ভয়ংকৰ পথ দুৰ্ঘটনাত। 

সোমৱতী অমাৱস্যা উপলক্ষে গংগা স্নানৰ উদ্দেশ্যে হৰিদ্বাৰ অভিমুখে যাত্ৰা কৰা হাৰিয়ানাৰ ছয় বন্ধুৰ মৃত্যু হ'ল উত্তৰ প্ৰদেশৰ মুজফ্ফৰনগৰত সংঘটিত এক মৰ্মান্তিক দুৰ্ঘটনাত। নিহতসকলৰ ভিতৰত আছে দুজন সহোদৰ ভাতৃ। সোমবাৰে পুৱতি নিশা প্ৰায় ৫ বজাত মুজফ্ফৰনগৰ ঘাইপথৰ জগ্গাহেড়ী টোল প্লাজাৰ সমীপত সংঘটিত হয় এই দুৰ্ঘটনা। 

জানিব পৰা মতে, পানীপটৰ দিশৰ পৰা তীব্ৰবেগেৰে আহি থকা যুৱককেইজনৰ বাহনখনে হঠাৎ নিয়ন্ত্ৰণ হেৰুৱাই পথৰ মাজৰ ডিভাইডাৰত প্ৰচণ্ড জোৰেৰে খুন্দা মাৰে। খুন্দাৰ প্ৰচণ্ড আঘাতত বাহনখন পথৰ বিপৰীত দিশৰ লেনত বাগৰি পৰে। ইয়াৰ পিছতে বাহনখনত জুইৰ সূত্ৰপাত ঘটে আৰু নিমিষতে সমগ্ৰ বাহনখন জুইৰ লেলিহান শিখাই আগুৰি ধৰে।

দুৰ্ঘটনাৰ তীব্ৰতা ইমানেই ভয়ংকৰ আছিল যে পথৰ কাষৰ এটা বৈদ্যুতিক খুঁটা দুটুকুৰা হৈ যায়। আনহাতে, ডিভাইডাৰৰ প্ৰায় দহ মিটাৰ অংশও বিধ্বস্ত হয়।

ঘটনাৰ খবৰ লাভ কৰাৰ লগে লগে স্থানীয় আৰক্ষী আৰু অগ্নিনিৰ্বাপক বাহিনীৰ দল ঘটনাস্থলীত উপস্থিত হয়। অগ্নিনিৰ্বাপক বাহিনীয়ে জুই নিৰ্বাপন কৰাৰ পিছত বাহনখনৰ ভিতৰৰ পৰা ছয়জন যুৱকক উদ্ধাৰ কৰি ততাতৈয়াকৈ চিকিৎসালয়লৈ প্ৰেৰণ কৰে। কিন্তু দুৰ্ভাগ্যজনকভাৱে চিকিৎসকে আটাইকেইজনকে মৃত ঘোষণা কৰে। ইতিমধ্যে আৰক্ষীয়ে দুৰ্ঘটনাটোৰ তদন্ত আৰু প্ৰয়োজনীয় আইনী প্ৰক্ৰিয়া আৰম্ভ কৰিছে।

এই শোকাৱহ ঘটনাই এতিয়া হাৰিয়ানাৰ হিছাৰ জিলাৰ ৰাখীগড়ী আৰু মোঠ গাঁৱত গভীৰ শোকৰ ছাঁ পেলাইছে। নিহত ছয়জনক চিনাক্ত কৰা হৈছে ৰাখীগড়ী গাঁৱৰ ছাহিল (২০), অমন (২১), অংকিত (২১) আৰু ৰাহুল (২৩) তথা মোঠ গাঁৱৰ অজয় আৰু অংকিত হিচাপে।

আটাইতকৈ হৃদয়বিদাৰক কথাটো হ'ল, নিহতসকলৰ ভিতৰত থকা অংকিত আৰু ৰাহুল আছিল সহোদৰ ভাতৃ। একেটা দুৰ্ঘটনাতে দুই পুত্ৰক হেৰুৱাই শোকত ম্ৰিয়মাণ হৈ পৰিছে পৰিয়ালটো। যি ঘৰখনত এদিন দুয়ো ভাতৃৰ হাঁহি-ধেমালিৰে পৰিৱেশ মুখৰিত হৈ আছিল, সেই ঘৰখনলৈ এতিয়া নামি আহিছে গভীৰ অন্ধকাৰ।

জানিব পৰা মতে, নিহত ছাহিল পেছাত এজন গাড়ীচালক আছিল। অমন, অজয় আৰু অংকিত আছিল শিক্ষাৰ্থী। আনহাতে, আনজন অংকিতে এচি আৰু ফ্ৰীজ মেৰামতিৰ কাম কৰি জীৱন নিৰ্বাহ কৰিছিল। ৰাহুল জড়িত আছিল গেছ ৱেল্ডিং আৰু ৰাজমিস্ত্ৰীৰ কামৰ সৈতে।

এটা পৱিত্ৰ ধৰ্মীয় উদ্দেশ্যৰে ঘৰৰ পৰা ওলাই যোৱা ছয়জন যুৱকৰ অকাল বিয়োগে দুয়োখন গাঁৱৰ লগতে অঞ্চলটোৰ ৰাইজক শোকস্তব্ধ কৰি তুলিছে।