নিজ দেশলৈ ঘূৰি যোৱাৰ মন; বাংলাদেশৰ পৰা নতুন পাছপ’র্ট বিচাৰিলে প্রাক্তন প্রধানমন্ত্রী শ্বেখ হাছিনাই

ডিজিটেল ডেস্ক: ভাৰতত আশ্ৰয় লৈ থকা বাংলাদেশৰ প্ৰাক্তন প্রধানমন্ত্রী শ্বেখ হাছিনাই নিজ দেশলৈ ঘূৰি যোৱাৰ মন মেলিছে আৰু এখন নতুন পাছপ'ৰ্ট বিচাৰিছে। নতুন দিল্লীত থকা বাংলাদেশৰ ৰাষ্ট্ৰদূতৰ কাৰ্যালয়ৰ পৰা তেওঁ এখন নতুন পাছপ'ৰ্ট আৰু এখন ৰাষ্ট্ৰীয় পৰিচয়-পত্র (এন আই ডি) বিচাৰিছে। প্রাক্তন প্রধানমন্ত্ৰীগৰাকীয়ে ডিচেম্বৰত নিজ দেশলৈ ঘুৰি যোৱাৰ আঁচনি লৈছে। প্রায় ১৫ বছৰীয়া শাসনৰ অন্তত বাংলাদেশৰ প্রাক্তন প্রধানমন্ত্ৰীগৰাকী ভাৰতলৈ অহাৰ পাছত নিজ দেশৰ কর্তৃপক্ষৰে এইটো হৈছে তেওঁৰ প্রথম যোগাযোগ। 

বাংলাদেশত চৰকাৰ বিৰোধী প্ৰতিবাদৰ মাজতে তেওঁ পদত্যাগ কৰি ২০২৪ চনৰ আগষ্টত ভাৰতলৈ পলাই আহিছিল। হাছিনাৰ অধিবক্তাই নতুন দিল্লীস্থিত বাংলাদেশৰ ভাৰপ্ৰাপ্ত ৰাষ্ট্ৰদূতৰ ওচৰত তেওঁক নতুন পাছপ'ৰ্ট প্রদানৰ বাবে আৱেদন দাখিল কৰিছে। অধিবক্তাগৰাকীয়ে হাছিনাৰ বাংলাদেশী নাগৰিকত্ব আৰু লগতে আন্তঃৰাষ্ট্ৰীয় মানৱ অধিকাৰ বিষয়ক আইনৰ অধীনত প্রাক্তন প্রধানমন্ত্ৰীগৰাকীক অনতি পলমে নতুন পাছপ'ৰ্ট আৰু এন আই ডি প্ৰদানৰ আহ্বান জনাইছে।

 ৰয়টাৰ্ছৰ তথ্য অনুসৰি, শ্বেখ হাছিনাই বাংলাদেশলৈ ঘুৰি গৈ আদালতত আত্মসমর্পণ কৰিব বিচাৰিছে। ইফালে, বাংলাদেশ চৰকাৰে সোমবাৰে স্পষ্ট কৰি দিয়ে যে শ্বেখ হাছিনাক নতুন পাছপ'র্ট যোগানৰ পৰিৱৰ্তে দেশখনে আইনী প্ৰক্ৰিয়াৰ জৰিয়তে ভাৰতৰ পৰা প্রত্যর্পণহে কৰিব বিচাৰিছে। বাংলাদেশৰ বিদেশ মন্ত্ৰ্যালয়ৰ ৰাজ্য মন্ত্রী হুমায়ুন কবিৰে কয় যে হাছিনাক পাছপ'ৰ্ট যোগান ধৰাৰ কোনো আঁচনি বাংলাদেশ চৰকাৰৰ নাই। তেওঁক পলাতক অপৰাধী বুলিও কয়।

উৎস: দৈনিক জনমভূমি