বগীনদীত চলিব উচ্ছেদ অভিযান; ১৩২টা পৰিয়াললৈ জাননী

ডিজিটেল ডেস্ক: ৰাজ্যত চৰকাৰী ভূমি বেদখলমুক্ত কৰাৰ বাবে প্রশাসনে চলোৱা অভিযানৰ অংশ হিচাপে লখিমপুৰ জিলাত উচ্ছেদ অভিযান অব্যাহত আছে। লখিমপুৰ জিলাৰ ৰঙানদী বিধানসভা সমষ্টিৰ অন্তৰ্গত ধৰ্মপুৰ বজাৰৰ পিছত জিলাখনৰ কদম ৰাজহ চক্ৰৰ অন্তৰ্গত মঙলবাৰ সাপ্তাহিক বজাৰৰ সমীপৰ ১নং পি জি আৰত এইবাৰ উচ্ছেদ চলিব। এই সন্দৰ্ভত কদম ৰাজহ চক্ৰৰ বিষয়াৰ কাৰ্যালয়ৰ পৰা যোৱা ১২ জুনতেই লিখিত নির্দেশনা জাৰি কৰা হৈছিল। 

প্ৰশাসনৰ তথ্য অনুসৰি, উক্ত ১নং পি জি আৰৰ ভূমিত দীর্ঘদিন ধৰি অবৈধভাৱে বসবাস কৰি আছে ১৩২টা পৰিয়ালে। চৰকাৰী ভূমি এনেদৰে বেদখল কৰি ৰখাৰ অভিযোগত স্থানীয় ৰাইজে বাৰে বাৰে প্ৰশাসনৰ ওচৰত অভিযোগ দাখিল কৰি আহিছিল। অৱশেষত স্থানীয় ৰাইজৰ অভিযোগৰ ভিত্তিত প্রশাসনে কঠোৰ স্থিতি গ্ৰহণ কৰি কালি চক্ৰ বিষয়াৰ কাৰ্যালয়ৰ ফালৰ পৰা উক্ত বেদখলকৃত ভূমিত ৰঙা কাপোৰ লগাই খুঁটা পুতি চৰকাৰী ভূমি হিচাপত নিৰ্দিষ্ট পৰিসীমা বান্ধি দিয়ে। 

অহা ১৪ নৱেম্বৰৰ ভিতৰত উক্ত ভূমি বেদখলমুক্ত কৰিবলৈ ১৩২টা পৰিয়াললৈ বেদখল উচ্ছেদৰ জাননী জাৰি কৰা হৈছে। জাননী লাভৰ পিছতে বহু অবৈধ দখলকাৰীয়ে নিজৰ বাসগৃহ নিজেই ভাঙি আচবাব-পত্র লৈ অন্য স্থানলৈ গমন কৰা দেখা গৈছে। উল্লেখযোগ্য যে, লখিমপুৰ বিধানসভা সমষ্টিৰ অন্তৰ্গত এই অঞ্চলত দীর্ঘদিন ধৰি চৰকাৰী ভূমি ভোগ-দখল কৰি থকাৰ অভিযোগ উত্থাপিত হৈ আহিছিল। সমগ্ৰ ৰাজ্যৰ লগতে লখিমপুৰ জিলা প্রশাসনেও চৰকাৰী ভূমি বেদখলমুক্ত কৰাৰ বাবে ধাৰাবাহিক অভিযান চলাই আছে বুলি জিলা প্ৰশাসনৰ এক সূত্রে জানিব পৰা গৈছে। উৎস: দৈনিক জনমভূমি