পৰিভ্ৰমী চৰাইৰ সুৰক্ষাৰ বাবে তামিলনাডুৰ ১২খন গাঁৱে পালন কৰে ফটকাবিহীন দীপাৱলী

ডিজিটেল ডেস্ক: সমগ্র দেশে আতচবাজী আৰু ফটকাৰ শব্দৰ মাজেৰে পোহৰৰ উৎসৱ দীপাৱলী পালন কৰাৰ বিপৰীতে তামিলনাডুৰ ১২ খনতকৈও অধিক গাঁৱে পৰিৱেশ আৰু বন্যপ্রাণী সংৰক্ষণৰ এক অনন্য নিদর্শন দাঙি ধৰিছে। ৰাজ্যখনৰ ইৰোড জিলাৰ ভেলোড পক্ষী অভয়াৰণ্য আৰু শিৱগংগা জিলাৰ ভেটাংগুড়ি পক্ষী অভয়াৰণ্যৰ কাষৰীয়া গাঁওসমূহে পৰিভ্ৰমী চৰাইসমূহক সুৰক্ষা দিয়াৰ স্বাৰ্থত ফটকা নুফুটোৱাকৈয়ে নীৰৱে দীপাৱলী উদযাপন কৰে। 

উল্লেখযোগ্য যে ইৰোড জিলাৰ গাঁওসমূহে এই বছৰ একেৰাহে ২১ সংখ্যক বৰ্ষৰ বাবে এই ব্যতিক্ৰমী পৰম্পৰা অক্ষুণ্ণ ৰাখিছে। প্ৰতি বছৰে শীতকালৰ আৰম্ভণিতে ছাইবেৰিয়া, ৰাছিয়া, অষ্ট্ৰেলিয়া, নিউজিলেণ্ড আৰু ইউৰোপৰ বিভিন্ন দেশৰ পৰা হাজাৰ হাজাৰ পৰিভ্ৰমী চৰাই প্ৰজনন আৰু খাদ্যৰ সন্ধানত তামিলনাডুৰ এই জলাশয়সমূহলৈ আহে। 

ভেলোড অভয়াৰণ্যত ১৪৮টা প্রজাতি আৰু ভেটাংগুড়ি অভয়াৰণ্যত প্রায় ২১৭টা প্ৰজাতিৰ চৰাইৰ আগমন ঘটে। এই আলহী আৰু থলুৱা চৰাইসমূহৰ ভিতৰত পেইণ্টেড ষ্টর্ক, এছিয়ান অ'পেনবিল, বাৰ-হেডেড গুজ, ইউৰেছিয়ান স্পুনবিল, স্পট-বিল্ড পেলিকান, ব্লেক-টেইল্ড গডউইট, গ্রে হেৰন, হোৱাইট আইবিছ আৰু কমন টিল আদি অন্যতম। 

দীপাৱলীৰ সময়ত ফটকাৰ প্ৰচণ্ড শব্দ আৰু ধোঁৱাই এই চৰাইসমূহক আতংকিত কৰি তোলাৰ লগতে সিহঁতৰ কণী আৰু পোৱালিসমূহৰ ক্ষতি কৰাৰ আশংকা থাকে। সেয়েহে, ভেলোড অভয়াৰণ্যৰ কাষৰীয়া ভাদামুগাম ভেলোড, চেল্লাপ্পামপালায়ম, পুংগাম্বাডী, মেট্টুপালায়ম, ইল্লাপালায়ম, চেম্মান্দামপালায়মকে ধৰি ১০খনতকৈও অধিক গাঁও আৰু ভেটাংগুড়ি অভয়াৰণ্যৰ সমীপৰ কল্লুকুডীপট্টি, ভেটাংগুড়িপট্টি আৰু এছ মাম্পট্টি আদি গাঁৱৰ শ শ পৰিয়ালে স্বেচ্ছাই ফটকা বৰ্জন কৰি আহিছে। আনকি কইম্বাটুৰৰ কিট্টাম্পালায়ম আৰু মায়িলাদুথুৰাইৰ পেৰাম্বুৰ গাঁৱৰ বাসিন্দাসকলেও বাদুলীৰ সুৰক্ষাৰ বাবে দীপাৱলীত ফটকা নুফুটোৱাৰ সিদ্ধান্ত গ্রহণ কৰিছে।

কোনো চৰকাৰী নিষেধাজ্ঞা অবিহনেই গাঁওবাসীয়ে গ্ৰহণ কৰা এই সিদ্ধান্ত এতিয়া এটা সামাজিক পৰম্পৰাত পৰিণত হৈছে। দীপাৱলীৰ নিশা এই গাঁওসমূহত কেৱল মাটিৰ চাকি জ্বলাই, নতুন কাপোৰ পিন্ধি আৰু মিঠাই বিতৰণ কৰি শান্তিপূর্ণভাৱে উৎসৱ পালন কৰা হয়। স্থানীয় কৃষকসকলৰ মতে, এই চৰাইসমূহৰ আগমনে ভাল বৰষুণৰ ইংগিত দিয়ে আৰু চৰাইৰ বিষ্ঠাই পথাৰৰ মাটি সাৰুৱা কৰি কৃষি উৎপাদন বৃদ্ধিত সহায় কৰে। গাঁওবাসীৰ এই প্রকৃতিপ্রেমক সন্মান জনাই প্ৰতি বছৰে দীপাৱলীৰ সময়ত তামিলনাডু বন বিভাগ আৰু জিলা প্ৰশাসনৰ বিষয়াসকলে গাঁওসমূহলৈ গৈ প্রতিটো পৰিয়ালক মিঠাই বিতৰণ কৰি কৃতজ্ঞতা জ্ঞাপন কৰে।

উৎস: দৈনিক জনমভূমি