ডিজিটেল ডেস্কঃ ছত্তীশগড়ৰ ভিলাইত এটা অনুষ্ঠানত গান গাই থকা আদিত্য নাৰায়ণে সংঘটিত কৰা ঘটনাটো সকলোতে বিয়পি পৰিছে। মঞ্চত গান গাবলৈ উঠি উদিত-পুত্ৰই হঠাৎ মেজাজ হেৰুৱাই পেলায়। অনুৰাগীৰ ফোন পেলাই দিয়াৰ উপৰিও যুৱকজনক হেণ্ড মাইকেৰে আঘাত কৰে। সেই ভিডিঅ’টো ইফালে সিফালে বিয়পি পৰিল। সমালোচনা আৰম্ভ হয়।
অৱশেষত এই ঘটনাৰ বিষয়ে মুকলিকৈ ক’লে আদিত্যই। আদিত্যই ক'লে, "এই সন্দৰ্ভত মই একো নকওঁ। মই কেৱল ঈশ্বৰৰ ওচৰত জবাবদিহি। এইখিনিয়েই ক’ম।’’
আনহাতে আয়োজকসকলে গায়কজনৰ হৈ ভাষ্য দিছে। অনুষ্ঠানটোৰ এজন আয়োজকে ক'লে, "সেই ল'ৰাটো কলেজৰ ছাত্ৰ নহয়, নিশ্চিতভাৱে কলেজৰ বাহিৰৰ কোনোবা। সি আদিত্যৰ ভৰি দুখন টানি আছিল। আদিত্যৰ ভৰিখন টানি লোৱাৰ লগতে ফোনটো লৈ ভৰিখনত কেইবাবাৰো চৰ মাৰিলে। ইয়াৰ পিছত তেওঁ মেজাজ হেৰুৱাই পেলালে।’
Continue Reading
