ডিজিটেল ডেস্কঃ এক শোকাবহ ঘটনা ঘটিছে পাটিয়ালাত। জন্মদিনৰ কেক খাই ৰহস্যজনকভাৱে এগৰাকী ১০ বছৰীয়া কন্যা শিশুৰ মৃত্যু ঘটিছে। পঞ্জাৱৰ পাটিয়ালাত ঘটা এই ঘটনাই এতিয়া শোকৰ ছাঁ পেলাইছে। ধাৰণা কৰা অনুসৰি খাদ্যৰ বিষক্ৰিয়াৰ ফলতে শিশুটিৰ মৃত্যু ঘটিছে। ছোৱালীজনীৰ ভনীয়েকেও কেকটো খাইছিল। তেঁৱো বৰ্তমান অসুস্থ হৈ পৰিছে বুলিও জনা গৈছে।
পাটিয়ালাৰ বাসিন্দা মানবীয়ে নিজৰ জন্মদিন উদযাপন কৰিছিল। জন্মদিনৰ কেকটো অনলাইনত অৰ্ডাৰ কৰা হৈছিল। মানবী আৰু তেওঁৰ ভনীয়েকে কেকটো খাইছিল। এটা ভিডিঅ'ত দেখা গৈছে যে পৰিয়ালৰ আন সদস্যসকলে মানবীক কেক খুৱাই আছে। কেকটো খোৱাৰ পিছতে শিশুটি অসুস্থ হৈ পৰ। মানবীৰ ভনীয়েকেও বমি কৰিবলৈ আৰম্ভ কৰে।
তেওঁলোকক ততাতৈয়াকৈ চিকিৎসালয়লৈ লৈ যোৱা হয় যদিও চিকিৎসকে মানবীক মৃত ঘোষণা কৰে। অৱশ্যে, তেওঁৰ ভনীয়েক কোনোমতে বাচি যাবলৈ সক্ষম হয়। ধাৰণা কৰা হৈছে যে ভনীয়েকে তেওঁ বমি কৰাৰ বাবেই শৰীৰৰ পৰা বিহ ওলাই আহিছিল। ঘটনা সন্দৰ্ভত মানবীৰ পৰিয়ালে এখন এজাহাৰ দাখিল কৰিছে। ন্যায় বিচাৰি ৰাজ্যৰ স্বাস্থ্য বিভাগলৈও অনুৰোধ জনোৱা হৈছে।
Continue Reading
