ডিজিটেল ডেস্ক: অসমৰ ৰাজনৈতিক ইতিহাসত এক নতুন অধ্যায়ৰ সূচনা কৰি আজি তৃতীয়বাৰৰ বাবে আনুষ্ঠানিকভাৱে গঠন হ’বলৈ গৈ আছে বিজেপি-মিত্ৰজোঁটৰ চৰকাৰ। ড° হিমন্ত বিশ্ব শৰ্মাই দ্বিতীয়বাৰৰ বাবে অসমৰ মুখ্যমন্ত্ৰী হিচাপে শপত গ্ৰহণ কৰি ৰাজ্যখনৰ শাসনভাৰ গ্ৰহণ কৰিব। চৰকাৰ গঠনৰ এই বিশেষ ক্ষণত চামগুৰিৰ পুৰণিগুদামত দেখিবলৈ পোৱা গৈছে এক ব্যতিক্ৰমী তথা প্ৰেৰণাদায়ক দৃশ্য।
পুৰণিগুদামৰ মুছলিম সম্প্ৰদায়ৰ ৰাইজে অঞ্চলটোৰ প্ৰায় ২০০ বছৰীয়া পুৰণি ঐতিহাসিক মছজিদত সমবেত হৈ নতুন চৰকাৰখনৰ সফলতাৰ বাবে আল্লাহৰ ওচৰত সমূহীয়া দোৱা কৰে। পুৰণিগুদাম ন-আলি মূৰৰ আঞ্জুমান ইছলামীয়াৰ উদ্যোগত আয়োজিত এই প্ৰাৰ্থনা সভাত ধৰ্মীয় ৰীতি-নীতিৰে চৰকাৰৰ মংগল কামনা কৰা হয়।
এই বিশেষ প্ৰাৰ্থনাৰ জৰিয়তে ৰাইজে মুখ্যমন্ত্ৰী ড° হিমন্ত বিশ্ব শৰ্মাৰ সুস্বাস্থ্য আৰু দীর্ঘায়ু কামনা কৰে। তেওঁলোকে আশা প্ৰকাশ কৰে যে আগন্তুক দিনত গঠন হ’বলগীয়া NDA চৰকাৰখনে অসমৰ প্ৰতিটো জাতি-জনগোষ্ঠী আৰু ধৰ্মৰ লোকক সমানে লগত লৈ আগুৱাই যাব। ৰাজ্যখনৰ উন্নয়নৰ যাত্ৰাত কোনো ধৰণৰ ভেদাভেদ নোহোৱাকৈ সকলোৱে যাতে সুফল লাভ কৰে, তাৰ বাবে চৰকাৰখন দায়বদ্ধ হ’ব।
সাম্প্ৰতিক সময়ত পুৰণিগুদামৰ ৰাইজে দাঙি ধৰা এই ঐক্য আৰু ভাতৃত্ববোধৰ নিদৰ্শনে অসমৰ সামাজিক পৰিৱেশত এক ইতিবাচক বাৰ্তা প্ৰেৰণ কৰিছে।
Continue Reading
