শশী থাৰুৰে গালে ‘এক অজনবী হাছিনা ছে…’, জাভেদ আখতাৰৰ তাচ্ছিল্য!

নতুন দিল্লীঃ শশী থাৰুৰৰ মুখত জনপ্ৰিয় হিন্দী গীত। 'এক অজনবী হাছিনা ছে ইউ মুলাকাত হো গায়ী…' গাই সমালোচিত কংগ্ৰেছ সাংসদগৰাকী। সমালোচনাত মুখৰ জাভেদ আখতাৰ। সমাজৰ স্পৰ্শকাতৰ বিষয়সমূহক কেন্দ্ৰ কৰি কৰা মন্তব্যৰ বাবে সময়ে সময়ে সংবাদ শিৰোনাম দখল কৰি আহিছে কংগ্ৰেছ সাংসদগৰাকীয়ে। অনুৰাগীসকলেও তেওঁৰ আচৰণৰ সৈতে পৰিচিত। তেওঁলোকৰ বাবে, শশী থাৰুৰৰ কথাবোৰ যেন বেদ বাক্যৰ সমান।

ৰাজনৈতিক ক্ষেত্ৰৰ জনপ্ৰিয় ব্যক্তিগৰাকীয়ে ৰাজহুৱা স্থানত হিন্দী গান গুণ-গুণোৱা বাবে সামাজিক মাধ্যমত এক হুলস্থূলীয়া পৰিৱেশৰ সৃষ্টি হয়। শশী থাৰুৰৰ অনুৰাগীয়ে প্ৰশংসাৰ বন্যাৰে সাংসদ গৰাকীক ওপচাই পেলোৱাৰ বিপৰীতে সৰব হৈ পৰিছে বলীউডৰ জনপ্ৰিয় গীতিকাৰ জাভেদ আখতাৰ। ১৯৭৪ চনত ৰাজেশ খান্না অভিনীত 'অজনবী' ছবিখনৰ ছুপাৰহিট গীতটো হঠাতে শশী থাৰুৰৰ কন্ঠত শুনি সাংসদগৰাকীক সমালোচনা কৰিছে জনপ্ৰিয় গীতিকাৰ জাভেদ আখতাৰে।

জাভেদ আখতাৰে শশী থাৰুৰৰ কন্ঠত বহুল সমাদৃত হিন্দী গীতটো শুনি মন্তব্য কৰিছিল যে, ‘ৱাহ! এনেকুৱা এটা গান সম্ভৱতঃ হিন্দীতো আছে…।’ জাভেদ আখতাৰে প্ৰকৃততে কংগ্ৰেছ সাংসদজনক তেওঁৰ হিন্দী উচ্চাৰণৰ বাবে সমালোচনা কৰা বুলি সংবাদ মাধ্যমত প্ৰকাশ পাইছে। শশী থাৰুৰে যদিও গীতিকাৰগৰাকীৰ মন্তব্যৰ প্ৰত্যুত্তৰ দিয়া নাই তথাপি পোষ্টটো দেখাৰ পাছত একাংশৰ মাজত হাঁহিৰ ৰোল উঠা দেখা গৈছে। উল্লেখ্য যে, শশীয়ে প্ৰকৃততে শ্ৰীনগৰৰ দূৰদৰ্শন চেনেলৰ এটা অনুষ্ঠানত গীতটো গাইছিল। ভিডিঅ'টো সাংসদজনে নিজেই সামাজিক মাধ্যমত শ্বেয়াৰ কৰিছিল। আৰু এই প্ৰসংগক কেন্দ্ৰ কৰি জাভেদ আখতাৰে থাৰুৰৰ হিন্দী উচ্চাৰণক লৈ সমালোচনাত সৰব হৈ পৰা পৰিলক্ষিত হৈছে।