ডিজিটেল ডেস্কঃ ট্ৰেন্সফাৰ-পোষ্টিঙৰ ক্ষেত্ৰত উচ্চতম ন্যায়ালয়ৰ সিদ্ধান্তৰ কেইঘণ্টামান পিছতে দিল্লী চৰকাৰে সেৱা সচিব আশিস ম’ৰক অপসাৰণ কৰে। এই সন্দৰ্ভত বিষয়াসকলে অৱগত কৰে। তাৎপৰ্যপূৰ্ণভাৱে বৃহস্পতিবাৰে (১১ মে’) দিল্লীৰ আপ চৰকাৰক ডাঙৰ সকাহ দি উচ্চতম ন্যায়ালয়ে ৰায় দিয়ে যে ৰাজহুৱা শৃংখলা, আৰক্ষী আৰু ভূমিৰ বাহিৰেও অন্যান্য সেৱাৰ ওপৰত দিল্লী চৰকাৰৰ আইনী আৰু প্ৰশাসনিক নিয়ন্ত্ৰণ আছে।
উল্লেখযোগ্য যে উচ্চতম ন্যায়ালয়ৰ সিদ্ধান্তৰ পিছত দিল্লীৰ মুখ্যমন্ত্ৰী অৰবিন্দ কেজৰিৱালে কৈছিল যে এতিয়া ইয়াত কাম ক্ষীপ্ৰ হ’ব কাৰণ আগতে তেওঁৰ হাত বান্ধি থোৱা আছিল। জনসাধাৰণৰ কামত বাধাৰ সৃষ্টি কৰা বিষয়াসকলে ইয়াৰ পৰিণামৰ সন্মুখীন হ’ব লাগিব বুলিও তেওঁ ঘোষণা কৰিছিল।
দিল্লী সচিবালয়ত কেবিনেট বৈঠকৰ পিছত অনুষ্ঠিত এক সংবাদমেলত মুখ্যমন্ত্ৰী কেজৰিৱালে বৃহস্পতিবাৰে কয় যে ৰাজহুৱা কামত বাধা দিয়া বিষয়াসকলে অনাগত দিনত ইয়াৰ পৰিণামৰ সন্মুখীন হ’ব লাগিব। "মোক হাত বান্ধি পানীত পেলাই দিয়া হৈছিল যদিও সকলো অসুবিধাৰ মাজতো আমি সাঁতুৰি থাকিলোঁ, আমি দিল্লীৰ বাবে ভাল কাম কৰিলোঁ।"
তাৎপৰ্যপূৰ্ণভাৱে দিল্লীৰ সেৱা নিয়ন্ত্ৰণৰ ক্ষেত্ৰত কেন্দ্ৰীয় আৰু ৰাষ্ট্ৰীয় ৰাজধানী অঞ্চল চৰকাৰৰ বিধানসভা আৰু কাৰ্যবাহী ক্ষমতাৰ সৈতে জড়িত আইনী বিষয়সমূহৰ শুনানিৰ বাবে সংবিধান বিচাৰপীঠ গঠন কৰা হৈছিল। কেন্দ্ৰীয় গৃহ মন্ত্ৰালয়ে ২০১৫ চনত এক অধিসূচনা জাৰি কৰিছিল যে দিল্লীৰ সেৱাৰ ওপৰত তেওঁলোকৰ নিয়ন্ত্ৰণ আছে। অৰবিন্দ কেজৰিৱালৰ চৰকাৰে এই অধিসূচনাক দিল্লী উচ্চ ন্যায়ালয়ত প্ৰত্যাহ্বান জনায়। কেন্দ্ৰৰ হৈ হাজিৰ হোৱা ছলিচিটৰ জেনেৰেল তুষাৰ মেহতা আৰু দিল্লী চৰকাৰৰ হৈ হাজিৰ হোৱা অধিবক্তা এ এম সিংৱীৰ যুক্তি শুনানি গ্ৰহণ কৰি উচ্চতম ন্যায়ালয়ে ১৮ জানুৱাৰীত ৰায় সংৰক্ষিত কৰি ৰাখিছিল।
Continue Reading
