ডিজিটেল ডেস্ক: এটা নেমুৰ দাম কিমান হ’ব পাৰে? ৫টকা, ৬টকা, ৭টকা অথবা সৰ্বাধিক ১০টকা৷ কিন্তু, আপুনি জানি আচৰিত হ’ব যে দেশৰ এটা প্ৰান্তত এটা নেমু বিক্ৰী হৈছে ৩৫,০০০ টকাত৷ হয়, অবিশ্বাস্য যেন লাগিলে এয়াই সত্য৷
তামিলনাডুৰ ইৰোড চহৰৰ শিৱগিৰি গাঁৱৰ ওচৰৰ পাজাপুচিয়ান মন্দিৰ কৰ্তৃপক্ষই সংবাদ মাধ্যমক জনোৱা অনুসৰি মন্দিৰটোত অনুষ্ঠিত নিলামত এটা নেমুৰ দাম ৩৫,০০০ টকা পৰ্যন্ত পোৱা গৈছিল।
প্ৰথা অনুসৰি, ইৰোড চহৰৰ পৰা ৩৫ কিলোমিটাৰ দূৰত শিৱগিৰি গাঁৱৰ ওচৰৰ পাজাপুচিয়ান মন্দিৰত শুকুৰবাৰে নিশা পালন কৰা মহাশিৱৰাত্ৰি উৎসৱৰ সময়ত ভগৱান শিৱক আগবঢ়োৱা ফলসহ নেমু আৰু অন্যান্য সামগ্ৰী নিলাম কৰা হৈছিল।
প্ৰায় ১৫ জন ভক্তই নিলামত অংশগ্ৰহণ কৰিছিল আৰু ইৰোডৰ এজন ভক্তক ৩৫,০০০ টকাত এটা নেমু বিক্ৰী কৰা হৈছিল বুলি মন্দিৰ কৰ্তৃপক্ষই সদৰী কৰে৷
মন্দিৰৰ পুৰোহিতজনে নিলাম কৰা নেমুটো দেৱতাৰ ওচৰত ৰাখিছিল আৰু এভাগ সৰু পূজা কৰিছিল আৰু শ শ ভক্তৰ উপস্থিতিত নিলামত সৰ্বাধিক নিবিদা কৰা ব্যক্তিজনক ঘূৰাই দিছিল।
এইটো বিশ্বাস কৰা হয় যে যিজন ব্যক্তিয়ে সৰ্বাধিক নিবিদা দাখিল কৰিবলৈ সক্ষম হয় আৰু নেমু পায়, তেওঁ আহিবলগীয়া বছৰবোৰৰ বাবে ধন আৰু সুস্বাস্থ্যৰ সৈতে আশীৰ্বাদপ্ৰাপ্ত হ'ব।
Continue Reading
