ডিজিটেল ডেস্ক: ২০২৩চনৰ পৰা অসমৰ সকলো চৰকাৰী চিকিৎসালয়ত এণ্টিভেনম বেজী উপলব্ধ হোৱাৰ পৰিপ্ৰেক্ষিতত অসমত সৰ্প দংশনত মানুহৰ মৃত্যুৰ হাৰ ২০২২ৰ ১৫০জনৰ পৰা ২০২৫ বৰ্ষৰ ৩১ডিচেম্বৰ পৰ্যন্ত ২৭জনলৈ হ্ৰাস পাইছে বুলি সৰ্প বান্ধৱ তথা অসম চৰকাৰৰ প্ৰাক্তন বন্যপ্ৰাণী ওৱাৰ্ডেন সৌৰভ বৰকটকীয়ে আজি তেজপুৰত সাংবাদিকৰ আগত সদৰী কৰিছে।
অসমৰ শক্তিপীঠ কামাখ্যা মন্দিৰ, গুৱাহাটী বিশ্ববিদ্যালয়ৰ চৌহদকে ধৰি অসমৰ বিভিন্ন ঐতিহ্যমণ্ডিত স্থানত দুষ্প্ৰাপ্য নাগচম্পা, ৰুদ্ৰাক্ষ গছ পুলি ৰোপণ কৰি এক নজিৰ সৃষ্টি কৰিবলৈ সক্ষম হোৱা সৰ্পবান্ধৱ সৌৰভ বৰকটকী টীমৰ উদ্যোগত আজি সাংস্কৃতিক নগৰী তেজপুৰৰ জিলা পুথিভঁৰাল চৌহদত অনুষ্ঠিত গছ পুলি ৰোপণ কৰা হয়।
ইয়াৰ শুভাৰম্ভ কৰে শোণিতপুৰৰ অতিৰিক্ত আৰক্ষী অধীক্ষক মৌচুমী কলিতাই। এটি ৰুদ্ৰাক্ষ গছ পুলি ৰোপণ কৰি অতিৰিক্ত আৰক্ষী অধীক্ষকগৰাকীয়ে আমাৰ প্ৰাকৃতিক ভাৰসাম্য বজাই ৰখাৰ বাবে গছপুলি ৰোপণ জৰুৰী বুলি ব্যক্ত কৰে। আনহাতে অনুষ্ঠানত অংশগ্ৰহণ কৰি সৰ্প বান্ধৱ বৰকটকীয়ে নাগচম্পা, ৰুদ্ৰাক্ষ আৰু বিভিন্ন ধৰণৰ ফলমূলৰ ৫০০জোপা গছ ৰোপণ কৰি ৫০০জোপাই প্ৰতিপালন কৰাৰ সংকল্পৰ কথা সদৰী কৰে।
সঁচাকৈয়ে নতুন বছৰৰ প্ৰথম দিনটোত সৰ্পবান্ধৱ সৌৰভ বৰকটকী টীমৰ এইয়া এক ইতিবাচক পদক্ষেপ বুলি সচেতন মহলে ব্যক্ত কৰিছে।
Continue Reading
